Ларгсса нюжмардул ахирданий, июльданул 26-нний, зунттаву бивщусса мурчал, ларчIсса чявхъа-гъараллал, бивчусса микIирал тамансса зараллу биян бунни инфраструктуралун, инсантурал къатран, шяраваллил хозяйствалун. Щунни вайннул щатIив Лакрал райондалийнгу.

Урувгнал дакI зия хьунсса къия хьуну дия Инишиял ва Вираттиял СПК-рттал гъаттарай. ЛивтIусса ризкьилул (оьллу, ницру, чу) ккал 100-ннийн лархъсса дур: Инишиял – 54, Вира­ттиял – 40-нния ливчусса.

Мурчал мурхьру гъагъан бувну, гъавгъсса мурхьирдал элект­ричествалул тталлу бивчуну, ххаллу дуцан дурну, цимирагу ссятрай инсантал чани бакъа ливчIун бия Гъумук ва лагма-щархъай.
Гъази-Гъумучиял ца ххуйшивуну ва лишанну хъанахъисса Ханнал-Бярнил чIюлушинна, лакрал миллатрал тарихравусса цимивагу иширал бардулт щавщилул мурхьру ва ххуллухьсса мурчал ва гъарал гужиращал лавну бакъая. Вай гъагъаву бювххуна цинявппагу лакран.
Гъараллал къачансса зарал биян бувну бур ххуллурдангу.
– Мурчащалсса, микIиращал­сса гъаралуннил биялсса ххуллурдугу зия бунни. МахIачкъала – Гъази-Гъумучи ххуллий, ЯтIул ламучIан биявайсса кIанай, ххуллул зума леркьунни. Ури-Мукьаривсса ххуллу, ххяли леркьун, цаппарасса хIаллайсса лавкьуну буссия. Мукунма райондалул цайми щархъавунсса ххуллурду бяххан бувсса, валтру дагьсса ишру цаймигу хьунни. Ххуллурдащал архIал, неххачIан гъанну дарцIусса ттарцIругу ларсун, ххаллу дурцун, Гъумучи ва цаймигу шяраваллурду чани бакъа лирчIун дуссия. Хъунма­сса барчаллагь, захIматсса гьавалул шартIирдах къабурувгун, инсантурал къатравун чани зана буллай зий бивкIсса райондалул электриктуран, – буслай ур Лакрал райондалул бакIчинал хъиривчув Явсупи ХIамзаев.
Урувгнал дакI зия хьунсса къия хьуну дия Инишиял ва Вираттиял СПК-рттал гъаттарай. ЛивтIусса ризкьилул (оьллу, ницру, чу) ккал 100-ннийн лархъсса дур: Инишиял – 54, Вираттиял – 40-нния ливчусса. Укунмавагу оьрму бутан, итталун дагьансса ккаккиярттайн лахъан захIматсса заманнай бигьа дакъасса ризкьичинал касмулуха зузиминнан биялну щуркIал хьунсса заралли ва. Циксса захIмат къабувхьунссия, циксса харжлугъ дуккан къадурхьунссия вайксса гъаттара хъуни баннин вайннуха зузиминнал.
Ккуллал райондалийгу неххал гъаттара лавсун бур тIи­сса хавар щялусса бушиву, талихIиннаран, райондалун гъарая хъунма зарал къабившиву бувсунни райондалул администрациялул бакIчинал хъиривчув Анатолий Давдиевлул. Мурчал Къяннал шяравусса Культуралул къатрал магъуйсса ца-кIира шифер ларсун дур ва неххал Ваччав шяраваллил хозяйствалуву ишла буллалисса чIиви-хъунсса ппаллу лавсун бур. Агъуллащалсса дазуйн ва райондалийсса щархъал, мащал ххуллурдайн дирчуну дур Автодорданул управлениялул техника.
Бадрижамал Аьлиева