МахIаммадлул арс Аьлиев МахIаммадхIажи
Оьрмулул 91 шинаву аьпалухьхьун лавгунни цала щала оьрму педагогнал пишалун хас бувсса инсан, цалла даврил хьхьичIунсса специалист, агьулданул ва жяматрал дянив бусравсса чув-адамина, Карашрал шяраватусса МахIаммадлул арс Аьлиев МахIаммадхIажи.
МахIаммадхIажи увну ур 1933-кусса шинал Карашрал шяраву. Гъумук хьхьичIунсса кьиматирттай педучилище къуртал бувну махъ, дахьа балугъравун увхсса оьрчI, дихьлай ивкIун ур дарсру оьрмулул сайки цащалва архIалсса учениктурахь. Дихьлай ивкIун ур дарсру личIи-личIисса школардай, личIи-личIисса кIанттурдай, личIи-личIисса миллатирттал дянив. Гьарцагу кIанай ванал цIагу бусраврай дакъа зумух къаласайва.
Ванал бусравсса биографиялуву хъиннува ккалли бансса затну ци хъанай бур учирча, ванияр 30 шинал хьхьичI, шагьрулийсса дузалсса цалва оьрмугу кьабивтун, МахIаммадхIажи ивзун ивкIссар буттал шяравун. Игу-ивзун, кIиккусса школагу цIуницIакул уттабуккан бувну, зун ивкIссар цувагу кIикку, цал директорну, яла, пенсиялийн увккун махъ, учительну. Цала ряхагу арсгу лагма лаган увну, буттал шяраву дурссия цIусса къатригу (цалла буттал къатри диркIсса кIанай).
МахIаммадлул арс Мусилахъал ХIажи (жул жяматрал дянив ванайн укунни учайсса) жуятува батIул шаврил пашманшивугу кIидачIлай, жижара буллай буру арсурваврахь, арсурваврал хъаннихь, оьрчIал оьрчIахь ва махъсса цинявппагу гъан-маччаминнахь.
Цал бунагьирттал аьпа баннав, рухI паракьатний дишиннав, имандалий лавгун хьуннав.
Карашрал жямат
ХIусманнул арс МахIаммадов Павел
Оьрмулул 65 шинаву хар-хавар бакъа жуятува батIул хьунни ЧIяйннал жяматрал дянив бусравсса арс, яхI-къириятрал увччусса зунтталчу, ХIусайннул арс МахIаммадов Павел.
Павел увну ур 1959-кусса шинал ЧIяйннал шяраву, муаьллимтурал – МахIаммадов ХIусайннул ва МахIаммадова Асиятлул кулпатраву. 1977-ку шинал лавайсса кьиматирттай къуртал бувну бур ЧIяйннал шяравусса дянивмур даражалул школа. Муния махъ, армиялул буржгу лавхъун, увххун ур Дагъусттаннал институтрал хIакинтал хIадур байсса подкурсирдайн. Институтраву дуклайгу унува зун увххун ур Республикалул онкодиспансерданийн. 1986-ку шинал лавайсса кьиматирттай Мединститутгу къуртал бувну, хирургнал пишалий зун тIайла увккун ур Белгородский областьрайсса Губкинск шагьрулул азарханалийн. Шикку Павеллул дурну дур 5 шин. 1991-ку шинал кIура авну Дагъусттаннайн, ва зун ивкIун ур Каспийскаллал шагьрулул азарханалий. Муния махъ зий ивкIун ур Ккуллал райондалул азарханалийгу.
2019-ку шиная шийнай Павел зий уссия МахIачкъала шагьрулул 1-мур азарханалий, цува къашай хьуннин.
Павел ия чIивину унува чIунархIал оьрчIаву низам дусса, давриву ва дуккавриву итххявхсса оьрчI. Ванан хъинну ххирая цала ЧIяйннал жяматгу, Лакку кIанугу, дусталгу.
Ванал хIалал дурссар чIярусса грамотартту ва бахшишругу. ИчIува Павел ия ххаллилсса лас, хIалимсса ппу, гъанминнай дакI цIуцIисса маччачу.
Павел аьпалул шаврил пашманшивугу кIидачIлай, дакIнийхтунусса жижара буллай буру кулпатрахь Аслихь, арснахь ЖахIпардухь, душварахь Мариямлухь ва Асиятлухь, уссурваврахь ва ссурваврахь, махъсса гъан-маччаминнахь. Бунагьирттал аьпа баннав, гьав нурданул дуцIиннав, рухI рахIатний дишиннав, махънал оьрмурду лахъи баннав. Амин!
ЧIяйннал жямат
Щайхов Данияллул аьпалун
Агь, Даниял, ттул куяв,
Чумартсса дакIнил заллуй,
Ина кьянкьассиявхха,
Хьхьара цан дав, ххирама.
Вил кьурчIисса бивкIулул
Кьуру цукун кьюлтI чиви,
КъабаянтIиссарив жун
Вил хъярчлийсса ихтилат.
Зий дакъацIайсса кару,
Цукун дацIан дав, куяв,
Чулийн къабувк умудру
Щийн аманат бав ина.
Ттул ххирасса куявтал,
Зу икьрал дурссиявкьай,
Гъидайдихьулул гьантрай
Ва дуниял кьаритан.
Апаннинан шанна шин
Дуван ца гьантта ливчIний
Даниялгу зевххунни
Пасатсса азарданул.
Агь, ххирамий, ххирамий,
Цу-цуманах аьтIува,
Язи-язими лаглай,
МахIрумну ливчIуннухха.
Игьалагу, Даниял,
Ахиратрал къатраву,
Вин алжан нясив баннав,
Гьав нурданул дуцIиннав.
Зул ххаллил арсурваврал
Зул цIарду ядуваннав,
Бусраврай ва хIурматрай
Зу дакIнин бичаваннав.
Роза Малучиева
