Парадрай гьуртту хьуна, цаннияр ца эмаратсса, Каспийскаллал флотилиялул жамирду. Ва кьини Каспий хьхьирий парадрай бия ракетардал, артиллериялул ва дазурдал жамирду. Вайннувух бия «Дагъусттан», «Углич» тIисса ракетардал жамирду, «Волгодонск» тIисса артиллериялул жами, «МахIаммад ХIажиев» тIисса базовый трактильщик , «Николай Ивашинцов» тIисса гидрографиялул жами, «Расул ХIамзатов» тIисса жами, РВК-933 рейдру дай­сса жами.
«Альбатрос» тIисса катерданий моряктал пишалул байрандалущал барча бувна контр-адмирал Олег Зверевлул ва Да­гъусттаннал бакIчи Сергей Меликовлул. Байрандалий гьуртту хьуна ДР-лул ХIукуматрал председатель Аьбдулмуслим Аьбдулмуслимов, Каспийск шагьрулул мэр Борис Гонцов, флотилиялул ветерантал ва идарарттал вакилтал.
Байрандалун хасъсса шадлугъру дайдирхьуна «Приветствие Петра I» тIисса театрданул зумунусса мероприятиялийну ва аьралий спортрал тIуркIурдайну.
Парад нанисса ппурттуву тIайланнасса эфирданий ккаккан увна аьралитал барча буллалисса Аьрасатнал президент Владимир Путин.
Президентнал ихтилатраву кIицI лавгуна, ва байран мудангу лахъа-хъунну дуллай бушиву, пахрулий ва хIурмат-кьиматрай бушиву цIанихсса тарих бусса Аьралий-хьхьирил Флот.
Каспийскаллал флотилиялул аьралитурал хьхьирий ва зуманицI ккаккан дурна флотилиялул аьралий инсценировкартту.
Мероприятиялий гьуртту хьуна 600-нийн бивсса аьралитал, 50-хъул жамирду, катерду ва 10 хасъсса аьралий техника.
Байрандалул лагрулий хьуна хьхьичIун ливчусса моряктуран паччахIлугърал наградартту дуллалисса мажлис.
Ванин хасну хьхьирийх итабавкьуна Николай Толченниковлул каялувшиндаралусса Каспийск шагьрулийсса ОьрчIал техникалул творчествалул центрданул чIава жамичитурал бувсса мюрщи жамирду.
Байрандалул кьини М.Ха­лиловлул цIанийсса паркраву кьинибархан най дия хасъсса аьралий операциялул ишру нанисса кIанттава дуркIсса аьралий техникалул выставка.
Байран къуртал хьуна салютру итадакьаврийну. Аьралий-хьхьирил Флотрал байрандалун хас дурсса концерт ккаккан дурна Каспийск шагьрулул майданнив.
Ва кьини тIайланнасса эфирданувух парад ккаккан дурна «Дагестан» РГВК-лул.
Гьарца байрандалий кунма, ва кьинигу хъуннасса хъар лархъуна агьалинал мюхчаншиву дузал дуллалисса ихтияр дуруччай органнал зузалтрал.
Имара Саидова