Июльданул 22-нний Сергей Меликовлул МахIачкъалаллал «Динамо» командалухь барча бунни Аьрасатнал премьер-лигалувусса цалчинмур тIуркIу, мукунма барча бунни циняв тамашачитал Дагъусттаннал команда Аьрасатнал футболданул элиталувун зана шаврищал.

– МахIачкъалаллал «Динамолул» цила цалчинмур тIуркIу бувна Аьрасатнал премьер-лигалуву Москавуллал «Химки» командалущал. Ва тIуркIу къуртал хьуна ничьялийну. Жула командалул кIилчин бавкьусса гол хIисаврайн къалавсна, цуксса хIайпнугу.
Шикку хъунмур иш, таблолийсса цифрардаву бакъарча, клубрал сезондалул тIуркIу байбишаврил гъиралухссар. Жува хIадурну буру ва бюхълай бур ххув хъанан! Вари хъунмур иш.
Мукун бушиву жула оьрчIал чIалачIи бувна: тIиртIуна счет, дургьуна оборона ва хIатта судьянал жула къапулувун ккаккан бувсса пенальтилул футболчитурал макьу зия къадуруна.
На, азарахъул дагъусттанлувтал куна, ххарину ура жулла командалул сивсуну байбишаврия лаваймур даражалул дивизиондалуву цала тарих. Утти ва тарих цукунсса хьунтIиссарив хъарну бикIантIиссар, футболчитурайн бакъасса, жула чулухасса кабакьулийнгу, хьхьичIуннайшивурттайнсса вихшалалийнгу.
Барча дуллай ура команда ва тамашачитал Аьрасатнал футболданул элиталувун зана шаврищал! ДакI дарцIуну ура «Динамо» командалул жува ттигу хIайран бантIишиврий!» — чивчуну бур цала Телеграм каналданий региондалул каялувчинал.
«Динамо» командалул хъиривмур тIуркIу хьунтIиссар ФК «Краснодар» командалущал июльданул 28-нний.
Лажин хIадур дурссар ХI.Аьдиловлул