Гьар шинах июльданул 26-нний дагъусттанлувтурал кIицI дайссар паччахIлугърал ца яла хъунмур байран – Дагъусттан Республикалул Конституциялул Кьини. Гьаман ва кьини 1994 шинал кьамул бувссар совет заманная махъсса Дагъусттаннал Конституция.
Июльданул 26-нний баян бувну бивкIссар Дагъусттан Республикалул Конституциялул Кьинину ва хьуссар аьмсса национал байран.
1994 шинал Дагъусттан Республикалул Конституция кьамул баву хьуссар чIявумиллатру бусса Дагъусттаннал халкьуннал паччахIлугъ лядуккаврил, демократия хьхьичIуннай шаврил ва правалул паччахIлугъ ччаннай дацIаврил ххуллийсса ца агьамсса ша.
1994 шинал Конституция кьамул бувну махъ ларгсса 9 шинал мутталий Дагъусттаннал ва щалва Аьрасатнал оьрмулуву хьуссар тамансса дахханашивуртту. Къуртал хьуссар лябуккулул цIусса чIумуйн буккайсса замана (переходный период). Мунийн бувну, 2003 шинал июльданул 10-нний кьамул бувну бивкIссар Дагъусттан Республикалул цIусса Конституция.
Ванийн чул бивщуну щурущи бувссар Дагъусттан Республикалул лаваймур даражалул къуллугъ, ва хьуссар исполнитель властьрал бакIчигу. Дахханашивуртту хьуссар Дагъусттан Республикалул законодатель орган дузал шаврил низамравугу.
Чан-чанну тIий, жущава бювхъуссар, цанницIун ца дакьин дурну, лядуккан дуван федерал ва республикалул законодательство.