Июль зурул 17-нний МахIачкъалалив, Поэзиялул театрдануву, хьунни Дагъусттаннал халкьуннал шаэр, гьунар бусса чичу, таржумачи, критик ва жяматийсса ишккакку Юсуп Хаппалаевлул цIанийсса премия дуллалисса мажлис.
Творчествалуха зузисса, Дагъусттаннал миллатирттал маз ва культура дуруччаврил цIаний захIмат бихьлахьисса жагьилтурал чIарав бацIаву мурадрайсса премияртту гьашину 23-чинни дуллалисса.
КIицI лаганну, Юсуп Хаппалаевлул цIанийсса фонд тIитIин пикри хьушиву буттал цIа узданну дуручлачисса ванал арсурвавран. Ва ххаллилсса даву дачин даврийну исват хъанай бур ппухълуннал аьдатирттайн бувну тарбия бувсса шаэрнал наслу, миллатрал дянив бакъассагу, щаллагу республикалул агьулданучIагу бусравну бушиву.
Гьашину Юсуп Хаппалаевлул цIанийсса премиялул лауреатътал хьуна гьунар бусса жагьилсса шаэртал Мариям ХIусманова, МахIаммад Мусаев, МахIаммад Манапов ва шаэр, таржумачи Алексей ХIажиев.
Конкурсрай ххув хьуминнан премияртту дуллай бия Юсуп Рамазановичлул арсру.
Мажлисрай гьуртту хьуна Дагъусттаннал Чичултрал союзрал секциярттал каялувчитал, жагьилсса шаэртал, журналистътал, творчествалул интеллигенция, дуклаки оьрчIру, шаэрнал наслу ва цаймигу.
Мажлисрал дайдихьулий Юсуп Хаппалаевлул назмурду дурккуна дуклаки оьрчIал. Дагъусттаннал шаэртуралгу дурккуна миллатирттал мазурдийн таржума дурсса шаэрнал назмурду.
Конкурсрай ххув хьуми барча буллалисса ихтилат бувна Дагъусттаннал Чичултрал союзрал правлениялул председатель, шаэр, таржумачи Марина АхIмадова-Колюбакинал.
– Юсуп Хаппалаев, махъ бакъа, гьунар бусса шаэрди. Ванал чивчуссар ххаллилсса шеърирду. ПасихIсса ва усттарсса шеърирдайну бакъассагу, ванал лакрал миллатрал литература авадан дурссар дунияллул классикалул произведенияртту таржума баврийнугу. Шаэртал уттавассар дакIний буссаксса, вайннал шеърирду ккалай буссаксса ва вай жяматрал зумув буссаксса. Юсуп Рамазанович ия икIайкунсса халкьуннал шаэр, ва тачIавгу халкьунная, цала миллатрая арх къаувцссар. ДакIнийхтуну барчаллагьрай бура уздансса буттал цIа дуручлачисса чумартсса наслулийн, – увкуна ванил.
Хъирив ихтилат бувна «Илчи» кказитрал отделданул редактор, шаэр, журналист ПатIимат Рамазановал.
– Юсуп Рамазанович ия инсаншиврул бутIа буллусса, мукъуй цIу бусса инсан. Тамансса хIаллай зий уссия «Илчи» кказитрал редакциялий. Мунащал зузисса ппурттуву ттун хъиннува бувчIуна ххишала бакъа гьунар бусса шаэр ушиву. Юсуп Хаппалаев, Абачара ХIусайнаев, Казбек Мазаев, ХIасан КIурухов, Руслан Башаев кунмасса бюхттулсса даражалул шаэртуращал зузисса хIаллай жу бивтссар лавайсса профессионализмалул журналистикалул школалул ххуллу. Хъирив нанисса никиран ва щалагу лакрал миллатран кьабивтссар ванал авадансса поэзия. Юсуп Хаппалаев жул коллективрангу аькьилсса маслихIатчи ва дугърисса, мукъуй цIу бусса, иш багьсса кIанттурдай ссал-бунугу хIакъираву аьй-бювкьу дан кIулсса инсан ия. БакIрая ччаннайн бияннин тIиссакссагу, буккайва ванал кказит. Бувккуну махъ, ванал жухь бусайссия цумур макьала ххуй дирзссарив. ДакIнийхтуну, ца буттал кунма, бусайва ванал жухь насихIатру. ХIакьинусса кьинигу дакIнин бутлайнма бикIару ванал жухьва байсса хъярч-махсартту.
Ялагу барчаллагь учин ччай бура, хIакьину жува шиккун батIин савав хьусса, цинявннан эбратрансса тарбия дусса шаэрнал наслулийн. Шиккугу исват хъанай бур цала гьунардануцIун Юсуп Рамазанович цIакьсса тарбиячигу, талихI бусса инсангу ивкIшиву, – увкуна ПатIимат Рамазановал.
Чичу, профессор Нажават (Жанна) Абуевал цила ихтилатраву чIурчIав дуруна, миллатрал маз ябаву мурадрайсса бюхттулсса даражалул премия дуллалисса мажлисрай гьурттушинна даврия рязину бушиврий.
– Юсуп Хаппалаев, лакрал бакъассагу, Дагъусттаннал литература авадан давривугу хъунмасса бутIа бивхьусса инсанни. ХIакьину ттул дакI дарцIунни, ци замана бучIарчангу, шаэрнал цIа, шаэрнал творчество миллатрал дянив уттарану дикIантIишиврий. Хаснура Юсуп Рамазановичлул кунна миллатрал маз ябаву мурадрайсса, ччаврил дурцIусса духьурчан. Барчаллагь бюхттулсса шаэрнал цIа лайкьну дуручлачисса арсурваврайн, – увкуна ванил.
Юсуп Хаппалаевлул цIанийсса премиялул лауреат Алексей ХIажиевлул цала ихтилатраву кIицI лавгуна, лакрал миллатрал поэзиялул усттар, бюхттулсса шаэрнал цIанийсса премия лайкь даву цалва оьрмулуву хьусса талихIран ккалли буллай ушиву.
– Шаэртурал миналий, ХьурукIрав, лявхъусса Юсуп Хаппалаев, Гъумук училищагу къуртал бувну, увкIссар ттул буттал шяраву Ккулув учительну зун. Учительшиврулмур магьиршиву дайдирхьуссар ванал Ккуллал шярава. Хъинну асар хьуна Юсуп Хаппалаевлул ттул нитти-буттан бахшиш бувсса цала луттирай «ХIурмат бусса Ккуллал гражданиннаяту» куну, чивчусса махъру. Ванал творчествалул произведениярттавасса цану ккалли бавияв жунна ва байран пишкаш дурсса, буттал цIа лайкьну дуручлачисса шаэрнал наслу, – увкуна ванал.
Шаэр дакIнин утлатисса, ванал творчествалун лавайсса кьимат бишлашисса ихтилатру бувна Дагъусттаннал халкьуннал чичу Хизри Илиясовлул, филологиялул элмурдал доктор Муса Багомедовлул, шаэртурал Сувайнат Кюребековал ва ХIамзат Изудиновлул. Ихтилатру буллалиминнал кIицI лавгуна Юсуп Рамазановичлул цIа абадлий яхьунтIишиву Дагъусттаннал культуралул ирс ябуллалиминначIа.
Ахирданий ихтилатру бувна шаэрнал арсурваврал ва душнил. Барчаллагь увкуна мажлисрай гьуртту хьун бувкIминнахь. Рирщуна дакIний личIансса суратру.
Имара Саидова
