Дагъусттаннал муштаритурал базардавусса дукиялул сурсатирттал багьри баххана шаврицIун, ДР-лул ХIукуматрал председатель Аьбдулмуслим Аьбдулмуслимовлул июльданул 24-нний дунни ва масъалалул хIакъиравусса батIаву. Региондалий цаппара сурсатирттал багьри лахъ хьуну бур, хаснува оьлил дикIул ва яттил дикIул.
Дагестанстатрал ккаккиярттайн бувну, гьашину майрай яттил дикIул ца килорал багьа бия 735,7 къуруш, гъаттарал дикIул багьа – 535,4 къуруш (багьри базардаву цаннияр ца личIи хъанай бия).
Республикалул базардаву дикI чан хьуну дакъар. Дагъусттаннал агьали дикIул щаллу буллай бур. ДакIнин бутанну, Аьрасатнал Федерациялул законодательствалул ккаккан бувну бур хъуслил багьри паччахIлугърал цалийн къабуцайшиву, вай илкинссар бикIан аьркинсса. Багьри хIасул шайссар рынокрайсса конъюктуралух (хъус чан-чIярушиврух) бурувгун.
Аьбдулмуслим Аьбдулмуслимовлул бувсуна ва масъалалун хасну цаппара идарартту хьхьарану зий бушиву. Ванал тIимунийну, аьркинну бур дукиялул багьри лахъ шаврил сававртту кIул дуван цIанасса тагьарданул анализ дуван, яла ,экономикалул ярагъ ишла бувну, базардавусса багьри цалийн буцин.
– Ва иширал хIакъираву чIявусса лабизавуртту ва аьрзарду букIлай бур инсантурая. Республикалул властьрал вакил бувсса органнан аьркинссар багьри лахъ шаврил сававртту дурчIин дуллалисса ва багьри лахъ хьун къабитан дуллалисса давурттая бусласисса даву дачин дуван социал сетирдай, официал сайтирдай. ХIакьину, масъала ххал бивгьуну махъ, жува аьркинссар багьри лахъ шаврил тагьар цалийн дуцаврил хIакъираву балжисса хIукмулийн бучIан, – куна Аьбдулмуслим Аьбдулмуслимовлул.
БатIаврий махъру лавхъуна ДР-лул экономикалул ва территориялул лябуккулул министр ХIажи Султановлул, ДР-лул шяраваллил хозяйствалул ва бакIлахъиялул министр Мухтарбий Аджековлул, ДР-лул промышленностьрал ва машлул министр Низам Халиловлул, ДР-лул УФАС-лул каялувчи Кьагьир Бабаевлул ва цайминналгу.
Махъру лавхъминнал бувсуна дикIул багьри лахъ шаврил сававрттал хIакъиравусса цалами пикрирду. Вайннувух дия цаппара экономикалул ххуллийсса сававртту, спекуляциялул ишру, майрал байраннай ва кьурбан байраннай багьри лахъ баву ва цаймигу.
Масъала ххал бигьаврил ахирданий премьер-министрнал куна: –Масъала ххал бигьаврия бучIан аьркинссар балжисса иширттайн, –куну. Ванал цаппара тапшурлугъру дурна Шяраваллил хозяйствалул , Экономикалул, Промышленностьрал ва машлул министерствардайн, жаваблувсса властьрал органнайн.
