«Лекъащай цIуку» Мирза Давыдовлун 85 шин шаврин хасну.

Июль зурул 12-нний Апанни Къапиевлул цIанийсса Лакрал театрдануву хьунни Да­гъусттаннал халкьуннал чичу, шаэр, прозаик, драматург, таржумачи, публицист, журналист, 50-нниха ливчусса луттирдал автор Мирза Давыдовлул 85 шинал юбилей.
Ванил дайдихьу дуллалисса махъ лахълай, Дагъусттаннал Чичултрал союзрал председатель, халкьуннал шаэр Марина АхIмадова-Колюбакинал бувсуна, цуппа Чичултрал союзраву чIярусса шиннардий Мирза Давыдовлущал зий бушиву, ва союзрал хъунаману Расул ХIамзатов зузисса ппурттуву ванал хъиривману, лакрал секциялул каялувчину зий ивкIшиву, цумур даврий зий ухьурчагу, бюхъу-бажар бусса, дуллалисса даву дакIцIуцIаврий дувайсса каялувчи ушиву. Мирза Давыдов барча уван ванищал архIал сахIналийн бувккуна Дагъусттаннал Чичултрал союзрал миллатирттал секциярттал каялувчитал: Шайхт-Ханум Аьлишева, Анварбек Култаев, Муса БахIаммадов, ХIамзат Изуттинов. Вайннал, бакIра-бакIрах тIиссакссагу, бувккуна Мирза Давыдовлул шеърирду миллатирттал мазурдийн таржума бувну: къумукьнал, нугъайнал, яруссаннал ва даргиял мазурдий. Мирза Давыдовлул творчествалия гьарза-гьартану бувсуна Да­гъусттаннал халкьуннал чичу Хизри Илиясовлул. Миллатирттал литературалул журналлал хъунама редактор Мурад АхIмадовлул бувсуна Мирза Давыдов ва цала ппу, халкьуннал чичу МахIаммад АхIмадов, цIакьсса дусшиврул бувгьуну бивкIшиву, вайннал дусшивугу, оьрмулул ва творчествалул ххуллугу жагьилминнан эбратрансса хъанахъишиву. Информациялул ва печатьрал агентствалул каялувчинал хъиривмур Наида МахIаммадовал, юбиляр барча уллай, кIицI лавгуна ва республикалий яла лараймур паччахIлугърал наградалун – «За заслуги перед РД» ордендалун ккаккан увшиву, дуллуна агентствалул чулухасса ХIурматрал грамотагу. МахIачкъала Шагьрулул депутатътурал мажлисрал каялувчи Марис Илиясовлул бувсуна цалва нитти-буттал хъунмасса хIурмат бивкIшиву Мирза Давыдовлул, ванал творчествалун лахъсса кьиматгу бищайсса бивкIшиву, цала агьулданий мудангу ванал цIанил хIурмат бикIантIишиву. Республикалул Жяматийсса палаталул хъунаманал хъиривчу Ссапарбаг Аьбдуллаевлул кIицI лавгуна Мирза Давыдов, пагьму-гьунар бусса чичу ушивруцIун, республикалий, дунияллий хъанахъимунил хIакъираву цаламур пикри бусайсса, дакIцIуцIаву дусса патриот, жяматийсса активистгу ушиву. Дагъусттаннал БакIчинал Хъунисриннал советрал член Шалласу Шалласуевлул бавтIцири махIаттал бувна Мирза Давыдовлул назмурду дакIних ккалай. Ванал увкуна: «Гьарца ванал кьаландалула буклакимур, чичлачимур бур бувккунал дакIнил асарду гуж буллалисса».
Ванал чивчусса «БивкIулийн лажинну» тIисса лу бур 1999-ку шинал жула аьрщарайн вахIшисса жанаварт-къачагътал ххявхсса чIумуя бусласисса. Ва луттирал 50, 100 шинаватугума барашинна дантIиссар жулва ххаллилсса тарихрал, жулла ялун нанисса никирахь тIайламур бувсун. Цайминнал, къатIайласса хаварду буслай, тарих баччан буллалисса, та ппурттуву жула инсантурал дур­сса чувшиву цайнна ласласисса чIумал, бусантIиссар хIакьмуния, душманнайн данди бавцIуну, вих хьун захIматсса къучагъшиву дурсса 33 жагьилная.
Ванал циняв шеърирду ялун нанисса ник тарбия дансса бур.
1974 шинал чивчусса, «Булбул» тIисса Мариян Дандамаеван хас бувсса шеърилуву Мирза Давыдов чичлай ур:

Бивтунни балайлийн
НякI чIутIул ккулла,
Абад кьабагьунни
Шадсса чагъана!
БакIру кьус диртунни
Урттул ва тIутIал,
Зума тIисса хханссар
Зунттал аьтара.

Укун пасихIсса, бюххансса шеърирду личIантIиссар лакрал тарихраву».
Чичу, шаэр Миясат Муслимовал бувсуна цуппа Мирза Давыдовлущал кIул хьуну ххюра шин ларгшиву, ва чIумул мутталий ванал диришиврия, зирангшиврия хIайранну бушиву, ва мудангу куклуну кIилчинмур зивулийн гьаз хъанай ушиврий тамаша бувну, жагьил заманнай цукссава зирангсса иявав тIий бушиву. Бувсуна цилва хъинну гъирарай оьрус мазрайн таржума бувшиву Мирза Давыдовлул Аьрасатнал Президент Владимир Путиннуясса поэма «Дус ва душман», «ЧантI уку, Украинай!». Мариян Илиясовал цIанийсса «Дараччи» фондрал хъунмур Гульшан Хасаевал бувсуна Мирза Давыдов тачIавгу фондрал даврия архну къаавцIушиву, аькьилсса маслихIат аьркиннийгу, информациялийнусса ка-кумаг аьркиннийгу чIарав ацIайшиву. «Илчилул» корреспондент ПатIимат Рамазановал бувсуна Мирза Давыдовлул сипталийну ва каялувшиврийну вузирдаву ккалаккисса лакрал студентътурал ккуран хIасул дурну, шаэртал, балайчитал ва музыкантътал гьурттусса ххуй-ххуйсса концертру республикалул шагьрурдайгу, Лакрал шяраваллавугу ккаккан дуршиву урчIцIалку шиннардий. Бувсуна Мирза Давыдовлул, исвагьи литературалуцIун, уттизаманнул тарих аьч буллалисса луттирдугу чивчушиву, «БивкIулийн лажинну» ва «Лекъащайсса цIуртти» тIисса луттирду щалвагу миллатрал бусрав-барчаллагьрай кьамул бувсса хьушиву. Чичу барча увна «Ростехнадзорданул» каялувчи Артур Амуттиновлул, ДучIиннал шяраваллил администрациялул хъунама АбутIалиб Аминовлул, «Ябувара жулва миллат» ккурандалул каялувчи, жяматийсса ишккакку Валида Исякьовал, ишбажаранчи Башир СантIуевлул. ДучIиннал шяраватусса активист МахIаммад Рамазановлул дурккуна дакIних Мирза Давыдовлул назмурдугу, цаллассагу.
Чичул юбилейрал шадлугъ чIюлу дурна ванал му­къурттийсса, агьалинан ччянива ххира хьусса балайрдайну Да­гъусттаннал халкьуннал артистътурал Луиза Шахдиловал, Саният Рамазановал, Халисат Батырбековал, Юлиана МахIаммадовал, Арслан Шахмардановлул, Загьидат Муслимовал, Ямлихан ХIажиевлул, Аьбдул Мурадовлул. Мажлис магьирну бачин бувну ия Дагъусттаннал Чичултрал лакрал литературалул секциялул каялувчи, Дагъусттаннал культуралул лайкь хьусса зузала Супиян Оьмаров. Лях-карах сахIналийн гьаз хъанай, чичун тIутIал кацIру ва чIапри буллай бия ванал творчествалул кьадру буми. Ахирданий тIутIавун ахьлавгсса Мирза Давыдовлул барчаллагь увкуна Лакрал театрданул хъуниминнахь ва коллективрахь, Дагъусттаннал Чичултрал союзрахь, цалва чIарав бавцIуну, ххуйсса даражалий хIадургу хьуну, цувагу, агьалигу рязину личIанну юбилей дуваврихлу.

ПатIимат Рамазанова