Ттун цахъис балжину бусан ччай бур, щил ци учирчагу, совет заманнай хъунмур никирал жагьилтурах дакIцIуцIаврийсса къулагъас ва иширайнусса чIаравбацIаву диркIшиврия. МяйцIалку шиннардил махъбутIуй, Дагъусттаннал халкьуннал чичу Мирза Давыдовлул хIасул дурна творчествалул итххявхсса лакрал студентътурал ккуран.

ХъунмурчIин студентътал республикалул вузирдаву дуклакисса бия. Бия шаэртал, балайчитал, композитортал, музыкантътал. Шинну агьалинал культуралух ччаву дусса, мякь бусса дия. Лакрал цумур шяравун гьарчагу, щапI куну зал бувцIуну лякъайва. Машгьурсса балайчитурахнияр цIусса цIардах мякь бувккун бикIангу бюхъайва. Яла чIяруми концертру ккаккан дурссия ЦIуссалакрал райондалий. Гъансса район дия, Мирза Давыдов хъун хьусса район дия, зал була учин цалламур райондалий бигьану бухьун­ссия. Кув автобусрай лагайссияв шяраваллавун, кувгу – машинарттай. Булбул Оьмариева ва на Мирза Давыдовлул цащалва буцайвав чIявуну. ЦIуссалаккуй концертру ккакан дуллалисса ппурттуву ДучIивсса ванал ссил ужагърай хъамалу бувнав циняв. ДакIнийри, МахIачкъалалив, Яруссаннал театрданувусса концерт, инсан щяикIансса кIану бакъа зал щапI куну бувцIуну бивкIсса. Ва концерт, тикрал дувара тIисса тамашачитурал миннатрайн бувну, кIилчингу ккаккан дурсса. Жул творчествалул бригадалуву буссия Тамара Закарьяева, Разита Мусаева, Зираят КьурбанмахIаммадова, Исмяил Юсупов, Руслан Оьма­риев, Максим Ильдаров ва цаймигу, хIакьину лакрал агьалинан ххуйну кIулсса цIарду. Таний вай сахIналийн буккаву интнил цIусса хIукъу буккаврин ккаллиссия. Ва ялагу, хIакьину нажагь бакъа концертирттай назмурду ккалай къабаяй. Таний поэзиялул кьадру кIулсса ник духьунссия, дюхханну, ххуйну назмурду ккалаккисса инсан кIилчингума сахIналийн уккан уллан бикIайва, гурсса хъатру ришлай. Тай дия, лакрал итххявхсса жагьилтал куннащал кув кIул хъанай, дусшиву дуллали­сса, творчествалуха зузиминнал цалчинсса опыт салкьи хъанах­ъисса, тяхъасса, ххарисса чIунну. Жагьилтал творчествалул ххуллийн буккавриву кабавкьуна Мирза Давыдовлул сипталийну ва хIарачатрайну хIасул дурсса творчествалул жагьилтурал ккурандалул. Нава кунма, гьармагу барчаллагьрай ухьунссар тIий бура тай яргсса чIуннардихлу Мирза Давыдовлуйн.

ПатIимат Рамазанова