Июльданул 9-нний Сергей Меликов къуллугърал аьрххилий ивунни Сергокъалаллал райондалийн. Райондалул бакIшяраву республикалул каялувчинал ххал бивгьунни цаппара объектру, икрам бунни Ватан дуручлай аьпалухьхьун лавгминнал гьайкалдануч1а. Яла хьунаавкьунни муниципалитетрал активращал, июньдалул 23-нний МахIачкъалалив ва Дарбантлив хьусса трагедиялул иширттацIунсса тагьар ххал дигьаву мурадрай. Региондалул бакIчинал ххал бивгьунни ттизаманнул Физкультуралул ва цIуллушиву цIакь даврил комплекс. Ва бувну бур Сергокъалаллал 1-мур школалул базалий, «Бизнес-спринт» тIисса федерал проектрал лагрулий.

Сергей Меликовлул тIиму­нийну, укунсса ттизаманнул комплексравун занан бюхъантIиссар, школалул оьрчIаща бакъассагу, шяраваллил циняв ялапарлувтуращагу.
Яла Дагъусттаннал бакIчи гьуртту хьуна Сергокъалалив СВО-лул гьурттучи Султан Ражабовлул аьпалун мемориаль ула тIитIаврий. Султан Ражабов ивкIссар МФЦ-лул зузала. 2022 шинал хушрай лавгссар жула Ватандалул дазурду дуручлан. Гьашину февральданий Султан оьрмулуцIа хьуссар цайвасса бурж бартбигьлай. Ванал аьпа­лул ула дацIан дурну дуссар МахIачкъалалив МФЦ-лул къатрай, утти мукуннасса ула дур Сергокъалаллал райондалийсса чIявуфункциярдал центрданийгу.
Сергей Меликовлул жижара бувна аьраличунал буттахь ва барчаллагь куна лайкьсса арс тарбия аврихлу.
Муния махъ хьуна Ватан дуручлай жанну дуллусса аьралийтурал аьпалул митинг. Региондалул каялувчинал тIутIив дирхьуна Аьрасатнал Виричу МахIаммад НурбахIандовлул гьайкалдануцI ва Сергокъалаллал къучагъсса цаймигу ялапарлувтурал суратирттацI.
Сергей Меликов хьунаавкьуна муниципалитетрал активращалгу. Июньдалул 23-нний хьусса иширттал хIакъиравусса аьщуй-ххуттай авцIусса ихтилатгу бувна Сергей Меликовлул. «Къудурсса ва инсапрацIа хьусса преступниктурал бандардал дуллалимунил зарал биян буллан къааьркинссар райондалул укунмасса инсантурайн», – увкуна ванал.
Республикалул каялувчинал бувсуна цала бакIрачIан бувкIсса ишираятугу: ганал дакIнин бувтуна цила чIумал кIанттул ялапарлувтурал цацIунма кабакьу бувну бивкIшиву.
– 2012 шинал на цаппара барзру бувссар зул шяраваллил чIарав. Та чIумал жу дуллай буссияв цаппара хасъсса мероприятияртту Сергокъалаллал ва Къарабудахкантуллал районнай. Та чIумалгу жун кумаг байва кIанттул инсантурал. Жун ларсун бучIайва щин, тIама ва цаймигу аьркинлугъ. Миннал жухь учайва: «ОьрчIрув, жу зун кумаг буванну, так зу жу мурахас бувара вай къачагътураща, жун ччай бур нигьачIаву дакъа яхъанан», – куну.
Сергей Меликовлул бусаврийну, Сергокъалаллал райондалул чIявусса вакилтал гьуртту хъанай бивкIун бур террорданиясса нигьачIаву духлаган давриву республикалун захIматсса чIумал. ХIакьинугу вай лайкьну гьунарду кка­ккан буллай бур СВО-лул зоналий. Гьунттий ярглийсса шин хъанай дур Аьрасатнал Виричу МахIаммад НурбахIандов накьлу хьуну. Мунал «Зузияра, уссурвал!» кусса лозунгралу хIакьинугу талай бур СВО-лул гьурттучитал. Жу пахрулий буру Сергокъалаллал укунсса арсная. Мунияту щала администрация ва муниципалитет цукуннивсса дахIавурттахун багьну бур тIутIаву къатIайлассар ва къалайкьссар, – куна Республикалул каялувчинал.
Дагъусттаннал виваллил иширттал министр, генерал-лейтенант Аьбдурашид МахIам­мадовлул бусаврийну, аьдлу-низам дуруччаврил органнал зузалтраву чIявусса бур Сергокъалаллал райондалул вакилтал, миннал дакI марцIну бартбигьлай бур цала къуллугърал бурж.
Хьунабакьаврий махъру лавхъуна Сергокъалаллал райондалул Имамтурал советрал председатель Аьппас ХIусайновлул ва райондалул цаппара вакилтурал.