ДР-лул Халкьуннал Мажлисрал председатель Заур Аскандаровлул тапшур бунни Республикалул клиникалул азарханалул Ожогирттал центрданул капитал ремонт дуван итадаркьусса арцу бюхъайссаксса мюнпатну ишла дуван.
Парламентрал спикернал республикалул цIуллу-сагъшиву дуруччаврил министрнал хъиривчу Ярослав Глазовлущал ва цайминнащал цачIу ххал бивгьуна отделение.
Ларгмур шинал майрай Ожогирттал центрданийн увкIсса чIумал Заур Аскандаровлул хIукму бувну бивкIссар ва отделениялий ремонт даврил сиптачи хьун.
Республикалул ЦIуллушиву дуруччаврил министерствалул каялувчинащал ва Халкьуннал Мажлисрал профил комитетращал цачIу масъала ххал бивгьуну махъ хIукму хьуну бур центрданул капитал ремонтран гьашину арцу личIи дуван.
Масъала Республикалул ЦIуллу-сагъшиву дуруччаврил министерствалул ва азарханалул вакилтуращал цачIу ххал бигьлагьисса чIумала, ДР-лул Халкьуннал Мажлисрал председательнал тIалав бувну бия смета цIакь дуллалисса чIумал хIисаврайн ласун арцу мюнпатну харж даву.
– РКБ-лул Ожогирттал центр Ухссавнил Ккавкказнаву бувагу цари бусса. Шикку капитал ремонт ччяния шиннай къадурссар.
ХIакьину жу ккаккан буварду балжисса шаттирду ремонт дайдишин хьхьичI, икьралгу дуварду давуртту дуллан рациональнайну: арцу харж дуван чара бакъа аьркинсса давурттан. Ремонтран личIи дурсса арцу харж дуван бюхъайссаксса мюнпатну. Ттущал та чIумал бивкIсса депутатътурайн тапшур бувссар ремонт нанаврил ялув бацIан, – куна Заур Аскандаровлул.
Капитал ремонт дуллай байбишин тIий бур сентябрь зуруй, давурттугу дуллантIиссар ятIапирттайну, отделениялул даву дацIан къаданшиврул.
Парламентрал спикернал тапшурлугърайну, бюджетрал бакъами кIанттурдаягу арцу лякъинтIиссар центр аьркинлугърал дузал буван.
ХIадур бувссар
ХI. Аьдиловлул
