Июльданул 8-нний МахIачкъалалив, Расул ХIамзатовлул цIанийсса Национал библиотекалий, хьунни Кулпатрал, ччаврил ва дакI тIайлашиврул кьинилун хас дурсса батIаву.
Ванил сакиншинначину бия Дагъусттан Республикалул ЗахIматрал ва социал лябуккулул министерство. Ва кьини шиккун оьвкусса, цимирагу шинай цачIу бавкьуну, нахIуну оьрму бутлатисса кулпатирттавух бия лакралссагу.
БавтIми барча буллалисса ихтилат бувна захIматрал ва социал лябуккулул министрнал буржру чIумуйну биттур буллалисса МахIаммадзагьид Кихасуровлул. Республикалул личIи-личIисса шяраваллавасса 24 кулпатран ванал дуллуна жяматийсса награда – «За любовь и верность» тIисса медаль. Вайннавух бия Гъумучатусса шанма кулпатгу: Камил ва ПатIимат Чутуевхъул, Шамил ва Зоя Къюннуевхъул, Ибрагьим ва Саида Катаевхъул.
Шикку хьусса ихтилатругу бия гьарцагу инсаннал оьрмулуву кулпатрал бугьлагьисса агьамсса кIанттуясса.
Бадрижамал Аьлиева
