Росгвардиялул МахIачкъалаллал соединениялул общежитиялучIа оьрчIансса площадка тIитIлатIисса шадлугърал мажлис хьунни. Площадка тIивтIунни ПаччахIлугърал Думалул депутат АьбдулхIаким ХIажиевлул кабакьулийну.
Мажлисрай гьуртту хьуна МахIачкъалаллал соединениялул личIисса батальондалул командирнал хъиривчу, майор Вадим Жаровцов, депутатнал кумагчи Ххадижа Аьлищайхова, Росгвардиялул зузалтрал хъами-оьрчI.
ОьрчIан цIунцIия къахьун площадка резиндалул бавкьуну бур. Шикку бивхьуну бур личIи-личIисса журалул гьайжакру, турникру, тренажерду, бигьалаган ччими щябикIансса скамейкарду.
Ххадижа Аьлищайховал барча бувна Росгвардиялул зузалтрал оьрчIру цIусса площадка тIитIаврищал, чIа увкуна шадсса, тяхъасса оьрчIшиву. Вадим Жаровцовлул соединениялул командованиялул ва зузалтрал цIания барчаллагь увкуна АьбдулхIаким ХIажиевлухь ва даву дан кабакьу бувну тIий.
Ахирданий зузалтрал оьрчIан ккаккан дурна дялахърулул программа, тIивтIуна нахIу-нацIулущалсса столлу.
Андриана Аьбдуллаевал
