Дагъусттаннал Росгвардиялул управлениялул зузалт ва аьралитал гьуртту хьунни июнь зурул 23-нний Дарбантлив дурсса терактраву оьрмулуцIа хьусса протоиерей (Покров Пресвятой Богородицы килисалул настоятель) Николай Котельников махъва-махъсса ххуллийн тIайла уклакисса аьпалул мажлисрай.
Шиккун мукунма бувкIун бия республикалул властьрал, Дарбантуллал администрациялул вакилтал, протоиерейнал гъан-маччами, дустал, шагьрулул агьали. Ххачпараснал аьдатрайн бувну, Николай Котельников увччуна 45 шинай цува къуллугъ буллай ивкIсса килисалучIа. Гьурттучитурал дирхьуна ванал гьаттай тIутIив.
Аьпалул мажлисрай гьуртту хьун бувкIун бия Росгвардиялул МахIачкъалаллал соединениялул аьралий оркестр. Росгвардиялул зузалт Дагъусттаннал Виваллил иширттал министерствалул вакилтуращал аьпалул мажлис къуртал хьуннин жяматийсса низам дуручлай бавцIуну бия.
