Июньдалул 19-нний «Дагестан» РИА-лул редакциялий хьусса ирглийсса пресс-конференция бия Дагъусттаннал региондалийсса Росреестрданул управлениялул каялувчинал хъиривчу Вячеслав Нитенкол ва «Роскадастр» ППК-лул директорнал хъиривчу Вадим Аьлибаговлул.
Вячеслав Нитенкол бувсуна гьашину республикалул 35 муниципал образованиялий 172 кадастровый кварталданийсса давуртту дансса ниятрай бушиву.
– Кадастрданул комплексравун дагьлагьиссар аьрщарал участокирттай дан ккаккан дурсса цинярдагу давуртту ва микку бивхьусса объектирдал дазурду рищаврил тIалавшиннарду биттур даву, – увкуна Росреестрданул вакилнал.
Ванал бусаврийн бувну, кIицI ларгсса давуртту дуллалиссар аьрщарал участокирттал, шикку бувсса идарарттал ва цаймигу объектирдал дазурду тIайла даву ва аьщуйн щуну ккаккан даву мурадрай. Му бакъассагу, аьрщарал участокирттал реестрданувусса дахханашиннарду дуваншиврул. Вай давурттал хIасиллуну хьунтIиссар кIанттул карта-план дурну хIадур бувсса документ.
Вадим Аьлибаговлул балжину бувсуна кадастрданул комплексравун духлахисса давурттая ва миннунсса харжлугърая. Ванал кIицI лавгуна, вай давуртту агьалинан мюнпат буну, бюджетравасса арцуйну дуллалишиву.
– 2024 шинал «Роскадастр» ППК-лул филиал жаваблувну бур 48 шяраваллил ва шагьрулул кIанттурдайсса кадастровый кварталданийн дагьайсса давуртту щаллу дан, – увкуна Аьлибаговлул.
Ванал бувчIин бувна кадастрданул комплексравун дагьлагьисса давурттал ккаккан дурсса низам душиву. Цалчинмур бутIуву, личIи-личIисса ведомстварттал вакилтурал гьурттушиннарайн бувну, цинявппа документру цачIун буллалисса комиссия хIасул байссар.
КIилчинмур бутIуву ЕГРН-далуву бусса информациялийн бувнусса аьрщарал участокирттал, идарарттал, объектирдал координатру ккаккан дайссар. — Миккугу инсантурачIа аьрщарал заллушиву тасттикь дуллалисса документру бухьурчанни Росреестрданувун ласунтIисса, – увкуна Вадим Аьлибаговлул.
Ванал бувсуна, инсантуран кIулну бикIаншиврул, кадастрданул комплексравун дагьлагьисса давурттал хIасиллу цифралул журалийн дурцуну рищунтIишиву Росреестрданул парталданий.
Имара Саидова
