Июльданул 4-нний «Дагъусттан» РИА-лий хьунни Дагъусттан Республикалул культуралул министр Зарема Буттаевал, Аь. Тахо-Годил цIанийсса Национал музейрал директор Пахруттин МахIаммадовлул ва Поэзиялул театрданул директорнал хъиривмур Ариза Батировал пресс-конференция. Шиккусса ихтилатру хьуна Кулпатрал шинацIун дархIуну зузи дуллалисса щалагу Аьрасатнал «Большие семейные выходные» проектрацIун бавхIусса.
ПроектрацIун дархIусса шадлугъру дуллантIиссар 6-мур июльдания байбивхьуну 1-мур сентябрьданийннин. Бигьалагай кьинирдай гьарцагу шагьрулий цимивагу кIанай хъанантIиссар вай.
Ва шин Кулпатрал шинну душиврийн бувну, ваницIунсса личIи-личIисса давуртту дуллай бур Аьрасатнал цинявппагу субъектирдай. Кулпатрал бусрав-сий, кьадру-кьимат муданмагу бусса Дагъусттаннай хъиннува. Хъамаллуврал бувсуна ва проект цукун дуркссарив, ванил лагрулий ци давуртту дуллантIиссарив.
«Большие семейные выходные» проектрал лагрулийсса цалчинсса шадлугъру хьунтIиссар вай ялун нанисса бигьалагай кьинирдай – июльданул 6-7-нний – июльданул 8-нний кIицI лагайсса Кулпатрал, ччаврил ва хаин къашаврил кьинилул хьхьичI.
Ахттакьуннай 16:00 ссятрава 19:00 ссят хьуннин Сулайман Стальскийл цIанийсса паркраву, Расул ХIамзатовлул цIанийсса проспектрай, Поэзиялул театрданул хьхьичI, Национал музейрал хIаятраву ва цаймигу кIанттурдай дикIантIиссар личIи-личIисса шадлугъру. Вайннувух тамашачитуран ттинингу кIулну диркIсса, ххира хьусса «Уличный музыкант», Поэзиялул театрданувусса «Театральная суббота», «Воскресный вечер с Национальным музеем Дагестана» ва м.ц..
ПроектрацIун дархIусса шадлугъру дуллантIиссар 6-мур июльдания байбивхьуну 1-мур сентябрьданийннин. Бигьалагай кьинирдай гьарцагу шагьрулий цимивагу кIанай хъанантIиссар вай.
«Большие семейные выходные» проектрал лагрулий хьунтIисса шадлугъирттая гьарта-гьарзану чивчуну бур Дагъусттан Республикалул Культуралул министерствалул сайтрай ва соцсетирдай.
Бадрижамал Аьлиева
