Дагъусттаннал Муфтиятрал никабру лаххаврийн чIумуйнусса къадагъа дуллашиву баян бунни Дагъусттаннал муфтийнал хъиривчу Аьбдулла Салимовлул.

– Миллатирттал политикалул ва диндалул иширтталсса буллалисса министерствалул никаб лаххаврил тагьар республикалий нигьачIисса душиврий чIурчIав дуллалисса обращениялийн чул бивщуну, фетвардал отделданул баян буллалиссар, нигьачIисса тагьарданува букканнин ва динчитурал цIусса заключение дуваннин никабру лаххан къадагъа дуллалишиву.
Июль зурул 1-нний муфтийнал бувсуна никабрайн къадагъа дуллалисса фетва хIадур буван дакIний бушиву. Шариаьтрал циняв текстру хъинну хъирив лавну ххал бивгьуну, фетвардалсса бувайсса отделданул баян бунни, чара бакъа цинявннал никабру лаххан къааьркиншиву исват буллалисса, гьанулун ласунсса хIуччарду бакъашиву, – увкуна ванал. БувчIин бунни, никабрайн цIакьсса къадагъа дувайшиву, агар агьалинал мюхчаншиву хьхьичI ххуттайн ласун багьлагьисса кIану бухьурча. ХьхьичIва Дагъусттаннал бакIчи Сергей Меликовлулгу баян бувна, никабирттайн къаршину ушиву цува, «чиваркIгу миннуву кIучI хьун» бюхъайсса сант дунутIий, «хъаннищагу никабраву ласун къабучIисса затру ласун бюхъан най бунутIий». Следственный комитетрал председатель Александр Бастрыкиннул ПаччахIлугърал Думалия тIалавшинна дурна «анаварну» никабирттайн къадагъа дуван. АхIмад-ХIажи Аьбдуллаевлул хьхьичIва баян бувна Дагъусттаннай кIанттул мизитирттавун заназисса радикалтал бушиву, бавчIуна ми шанма бутIуйх: аслийсса диндалул ххуллийх наними, муфтиятрал тарап къакьамулми ва цавагу чулух бакъасса «ваххабитътурал» кьюкьравун хIала хьун хIадурнувами.

ПатIимат Рамазанова