Москавлив ялапар хъанахъисса дагъусттанлувтурангу хъинну кьурчIи бивзунни Дагъусттаннай хьусса оьхIалсса ишру. Дарбантлив ва МахIачкъалалив терактру дурну, лавмартътурал оьрмулуцIа бунни полициялул зузалт, багьана бакъасса инсантал. Аьрасатнал душмантурал, националистътурал ва террористътурал жувунна ццахханну рутан, личIи-личIисса миллатирттал ва диннал инсантурал дянив ссивцIу бутан кьаст лархIунни.
ЦIанасса жула цинявннал мурад, укунсса провокациярдал хъяврин бан къабавцIуну, миллатирттал ва диннал цашиву дуруччавур.
Ва оьхIалсса тахсиркаршиву дан пикри хьуминналгу, щаллу дурминналгу личIи-личIисса миллатирттал, диннал, культурардал дяниялу зия даву, душманшиву дутаву мурадрай кьадарну ишла дунни ххачпараснал диндалул байран дусса мубараксса кьини.
ЧIалай бур, мубараксса диндалул къатри пIякь учин даврийну вайннан жула общество кIидищун дансса, жула халкьуннал дянив дичинсса кьаст диркIшиву. Щак бакъар, ихтиярду дуруччай органнал ва хасъсса идарарттал ччясса чIумул мутталий ва тахсиркаршиву щаллуну аьч дансса хIарачат бантIишиврий, тахсиркартурангу багьайсса танмихI кьукьинтIишиврий.
Терактраву оьрмулуцIа хьуминнал гъан-маччаминнахь, дакIнийхтуну кьурчIишиву кIидачIлай, жижара буллай буру. Ва захIматсса чIумал жугу зул чIарав буссару. Ва жула аьмсса къювур.
Щавурду дирминнай, цIунцIияртту хьуминнай Заннал цIими бишиннав!
«Дагестан» МЦК-лул
президент Арсен ХIусайнов, президиумрал члентал
