Июньдалул 22-нний ЧIяйннал Культуралул къатраву хьунни Буттал КIанттул цIанийсса Хъунмасса дяъви байбивхьусса аьпалул ва къювулул кьини дакIнин дутлатисса мероприятие.
Билаятрал тарихраву пашманну дакIний лирчIсса кьинилун хас дурсса батIаву тIиртIунни Культуралул къатрал хъунмур СалихIат Алхасовал.
Мероприятие дайдирхьунни минутIрайсса пахъ багьаврийну. Шикку гьуртту хьунни ЧIяйннал школалул учительтал ва дуклаки оьрчIру.
Хъирив цинявппагу лавгунни Хъун дяъвилул гьурттучитурал гьайкалдануцI тIутIив дишин. Аьрай жанну дуллуми дакIнин бичлачисса ва дяъвилул тарихраясса ихтилат бунни ЧIяйннал шяраваллил ветерантурал советрал председатель МахIаммад Апандиевлул. Дуклаки оьрчIал бувккунни шеърирду, ккаккан дунни патриот зумунусса концертрал программа.
Имара Саидова
