Аьпалул ва къювулул кьини, ДР-лул БакIчи Сергей Меликовлул сипталийну, хьунни СВО-лул гьурттучитуран хас бувсса «Герои нашего времени» тIисса цIанилусса конференция. Сергей Меликовлул шикку бувсса ихтилатраву барчаллагь баян бунни хасъсса аьралий операциялий гьуртту хъанахъиминнал чIарав бацIлацIисса дагъусттанлувтурахь.

– ДакIнийхтуну барчаллагьрай ура хасъсса операциялий гьуртту хъанахъисса жула аьралитурай дакI цIуцIисса, кумаг буллалисса инсантурайн. Пахрулий ура, аьралитурачIан чагъарду чичлай, посылкарду тIайла дуклай, шайсса куццуй чIарав дацIлацIисса ялун нанисса никирая. Цинявннан кIулссар жула инсантурал «Каспий» батальондалун, цаймигу аьралий подразделениярттан, хасъсса операциялул гьурттучитуран чялиш бувккун кумаг буллай бушиву. Операциялул ишру нанисса кIанттурдайн гьан дуллалисса гуманитар кумаграл цикссагу азардахъул тоннарду, хIат-хIисав дакъасса бур агьалинал хIарачатрайну бувсса кумаг, – увкунни Сергей Меликовлул.

Конференциялий 136-мур Уманско-Берлинский гвардиялул мотострелковый командованиялул чулуха Барчаллагьрал чагъар ва «Воинское братство» тIисса медаль дуллунни ЦIуссалакрал райондалул Депутатътурал мажлисрал председатель Аслодин Аслудиновлун. Аьралий буржру бартбигьлагьисса бригада барчаллагь баян буллай бур хьхьичI ххуттай бавцIусса аьралитуран гуманитар кумаг буллалисса Аслодиннуйн.
«ДакIнийхтуну асар хьунни жухара дуллалисса аякьа.

ХIакьинусса кьини ина кунма чумартсса инсантурал дуллалисса давурттан багьа бакъассар. Зу кунмасса патриотътал жула аьралитурал махъ буссаксса, ххувшаву ласунсса вихшалагу ххишала хъанай дур», – тIий чивчуну бур аьралитурая бувкIсса Барчаллагьрал чагъарданий.
Буниялагу барчаллагьран лайкьссар къучагъну аьралий бурж бартбигьлагьисса жагьилтурал махъ бацIан хIадурсса уздансса инсанталгу.
Шиккува кIицI лаган, хасъсса операциялул гьурттучитуран ва миннал кулпатирттан цикссагу кIицI лагансса кумагру бунни Аслодин Аслудиновлул.

Имара Саидова