Медициналул ххуллу язи бувгьуну, агьалинал цIуллу-сагъшиврул къаралданий бавцIуминнал пишалул байран кIицI ларгунни жула билаятрай. Хьунни Москавливгу медициналул зузалт лахъа-хъун буллалисса шадлугърал мажлисру.
«Дагъусттан» Москавуллал Культуралул центрданул ва центрданучIасса Медициналул зузалтрал ассоциациялул сипталий «Горная симфония – Халяль» ресторандалуву хьуна, центрданул гьану бивзния шихунмай аьдатравун багьсса, хIакинтал барча буллалисса мажлис.
КIицI лаган, 1990-ку шинал Москавуллал ва Дагъусттаннал хIакинтал лагма лаган баву мурадрай, «Дагестан» МЦК -лучIа сакин дурссар Медициналул зузалтрал ассоциация. Москавливсса ва Москавуллал областьрайсса сайки циняв клиникардай, азарханардай, элмулул ва ахттаршиннардал институтирттаву ва медициналул вузирдаву зий ва дуклай бур Дагъусттаннаясса хIакинтал, азарахъул ординатортал, аспирантътал, медициналул ссурвал, студентътал. Цивппагу шиная шинайн чIяву хъанай бур.
Мажлис тIитIлай, хIакинтал барча буллалисса, миннал пишалул агьамшиву, медициналул ххуллу язи бувгьуминнал инсаншиву, рахIму-цIими кIицI лаглагисса ихтилат бувна «Дагестан» МЦК-лул президент, техникалул элмурдал доктор, академик Арсен ХIусайновлул. Москавлив ва Москавуллал областьрай зузисса Дагъусттаннал хIакинтурал пишакаршиврия, медициналул вузирдаву дуклакисса жулва оьрчIал ва душварал ккаккиярттая бусласисса ихтилат бувна Медициналул зузалтрал ассоциациялул каялувчи, психологиялул элмурдал кандидат, доцент Гулизар Башанаевал.
ХьхьичIунсса пишакартуран шадлугърал даражалий дуллуна личIи-личIисса наградартту. Дагъусттаннал ЦIуллу-сагъшиву дуруччаврил зузалтрал профсоюзрал чулуха ХIурматрал грамотартту ва Барчаллагьрал чагъарду буллуна Медициналул ассоциациялувусса, давриву ххуйсса ккаккияртту чIалачIи дурсса, хьхьичIунсса, нукIува машгьур хьусса ва жагьилсса хIакинтуран. Миннавух бия лакгу: «Моситалмед» тIисса Медициналул центрданул хIакин -ревматолог, профессор Багъдади Аьлиханов, ГЦГСЭН-лул отделениялул хъунама Бахрам Аьлиев, шагьрулул оьрчIал поликлиникалул участокрал педиатр Зарема Амирова, хIакин-эндокринолог, И.Сеченовлул цIанийсса Москавуллал медициналул Цалчинмур университетрал эндокринологиялул кафедралул аспирантка Жарият Шиллаева, Лазерданул хирургиялул клиникалул хъунмур хIакин Тутубава Башанаева, С.Боткиннул цIанийсса азарханалул хIакин-офтальмолог Аьбдул Мисриханов.
«Верность Дагестану» тIисса медальлу дуллуна шагьрулул 13-мур азарханалул хIакин, анестезиолог-реаниматолог МахIаммад МахIаммадовлун ва А.Вишневскийл цIанийсса НМИЦ-рал ортопедиялул отделениялул медсестра Пери Магьриеван.
Наградартту дуллай бия Арсен ХIусайнов ва Гулизар Башанаева. Вайннал кIицI лавгуна Москавлив ва Москавуллал областьрай личIи-личIисса клиникардай ва медициналул центрдай зузисса Дагъусттаннал хIакинтал сайки циняв сийлий ва бусравну бушиву, вайннал пишалул даража лавайсса бушиву, вайннал хъунмасса кумаг байшиву Дагъусттанная бувкIсса къашайшалт Москавуллал азарханардай уттубишин бан, миннан аьркинмур щаллу дан, чIявуми жула хIакинтал чялишну гьуртту шайшиву «Дагестан» МЦК-лул дуллалисса мероприятиярттай. Бувсуна октябрь зуруй, жагьилсса хIакинтурайн, медициналул вузирдал студентътурайн, ординатортурайн, аспирантътурайн ва цIуллу-сагъшиву дуруччаврил сфералувусса хьхьичIунсса пишакартурайн оьвкуну, жагьилсса медициналул зузалт ва опыт бусса пишакартал цаннащал ца кIул баву, опыт кIибачIаву мурадрай, Жагьилтурал медициналул форум дан дакIний бушиву. Заннал кабавкьуну, дакIниймур бартлаганнав.
Андриана Аьбдуллаева
