«Аьрасат – ттул тарихри» тIисса музейраву лахъа-хъунсса даражалий кIицI ларгунни Медициналул зузалал кьини.
Мажлисрай гьуртту хьунни ДР-лул ХIукуматрал председатель Аьбдулмуслим Аьбдулмуслимов, ДР-лул цIуллу-сагъшиву дуруччаврил министр Татьяна Беляева ва республикалул медициналул идарарттал зузалт.
Татьяна Беляевал барча дурна медициналул зузалтрахь пишалул байран ва барчаллагь увкуна гьарица кьини инсантурал цIуллу-сагъшивруха дуллалисса аякьалухлу.
– ХIурмат бусса медициналул зузалт!
ХIакинтурал пиша бур яла бусравмур. Зу буллалисса захIматран кьимат бищун къашайссар. Гьарца кьини дуллалисса бигьа дакъасса даврицIун, зу чIарав бацIлай буру захIматсса тагьарданувун багьсса инсантуран «Анаварсса кумаг» аьркинсса чIумалгу. Зул кумаграцIух ччаннай бавцIуссар ххуллурдай апатIру хьусса, нигьачIисса иширттавун багьсса инсантал. Медициналуву нирхиравун дагьлай дур цIу-цIусса кьяйдарду, буклай бур гужсса даруртту ва аппаратура. Зул захIматрайну буллай буссар лавайсса технологиярттайнусса медициналул личIи-личIисса кумаг. Хьулвагу бакъассия цIанасса ппурттуву жула республикалий буллалисса операцияртту та-бунугу жучIава булланссар тIисса. Медициналул 18-хъул идарарттай бувну бур лавайсса даражалул технологиярттайнусса 40 азарва операция.
Махъсса 5 шинал мутталий республикалий бувну бур 125 ФАП, 12 азархана ва поликлиника, миннува 2 бур МахIачкъалалив. ГьануцIакулсса ремонт дурну дур цIуллу-сагъшиву дуруччаврил 135 объектрай. Медициналул идарарттай дирхьуну ва зузи дурну дур 3143 оборудование, 28 компьютерный томограф, 5 магнитно-резонансный томограф, 3 ангиографический установка ва 2 линейный ускоритель.
ЦIусса оборудование дишаврийну лавай хъанай бур медициналул кумаграл даража. Пайда бакъассар вай цIушиннардия, агарда вайннуха зунсса профессионалтал бакъахьурчан.
ХIакинтал буссар оьрмулухун дуклайна. Вайннал хьхьичI бивхьусса агьаммур масъалагу гьарица кьини инсантурал оьрмурду ххассал буллалавур.
ЦIанасса заманнай даххана хъанай дур хIакинтурал пишалул чулухуннайсса тIалавшинна. Дагъусттаннал медиктурал, вай тIалавшиннарду лайкьну бартдигьлай, хIалал буллай бур Аьрасатнал билаятирттаясса коллегахъал чулухасса хIурмат-кьимат.
Цал ттигу дакIнийхтуну барчаллагь тIий бура зухь, къуллугърал бурж дакI марцIну бартбигьлай тIий, – увкуна Татьяна Беляевал.
ХIакинтурахь пишалул кьини барча дурна Аьбдулмуслим Аьбдулмуслимовлулгу. Шиккура Татьяна Беляевал ДР-лул ЦIуллу-сагъшиву дуруччаврил профсоюзрал комитетрал чулухасса премияртту дуллуна давриву хьхьичIунсса ккаккияртту дурсса, медициналул сфералуву зузисса чIявусса оьрчIру бусса ниттихъан. Вай лайкь дурминнавух бия 9-10, хIатта, 11 оьрчI тарбия буллалисса, хIакинталну зузисса ниттихъул.
Имара Саидова
