Вай гьантрай «Дагестан» РИА-лул залдануву хьунни МЧС-рал Агьаммур управлениялул хъунаманал хъиривчу, ялув бацIаврил ва профилактикалул даврил отделданул хъунама Анвар Анваровлул пресс-конференция.
Ва дия гъинттул, кIиришиву дусса чIумал, цIу къалачIунсса чаран лякъаврил хIакъиравусса. Ххюва зурул хIасиллу дуллай, Анвар Анваровлул бувсуна ва чIумул дянив Дагъусттаннай 116 пожар хьушиву. Вай хъанай дур ларгсса шинал вара чIумуву хьуминнуяр 13% чанну (л.ш. — 1284).
ОьрмулуцIа хьуну ур 16 инсан (л.ш. – 10), миннава 6 мюрщисса оьрчI (л.ш. — 2).
ЦIунцIияртту хьуну дур 17 инсаннан (л.ш. — 22).
ЦIу ларчIсса иширттая 98 млн.423 азарда къуруширттансса зарал хьуну бур (л.ш. – 115 млн. 34 азарда къуруш).
ЦIу ларчIсса кIанттурдая ххассал увну ур 82 инсан (л.ш. — 138), дуккан дан бювхъуну бур 68 млн. ва 600 азарда къуруширттансса хъус (л.ш. – 70 млн. 630 азарда къ).
ЦIу ларчIсса ишру чIявуми хьуну бур электричествалул приборду сававну (257 иш), цIарая мугъаят къавхьуну (414), пачру ва пуркIу буккайсса бярчIурду тIайла бакъа бивхьуну (27 иш).
КъатрацIух, хъуслицIух цIу лачIунсса багьантту личIи-личIисса хъанай бур. Дуклаки оьрчIру, каникуллу дайдирхьуну, хъунмурчIин цанма цивппалу личIлай бур. ЦIу ларчIсса чIумал мугьлат бакъа му лещан дан хIадурну икIан аьркинссар гьарица инсан. Мюрщисса оьрчIан лахьхьин бан аьркинссар укунсса тагьарданий ци дуллантIиссарив, цукун занакьулу бикIан аьркинссарив. ОьрчIан апатIру хьусса пожарду хъунмурчIин цивппа оьрчIру сававну, цIаращал тIуркIу тIий бивкIун, мукунна хъуниминнал баччибакъулшиву дурну, оьрчIру цахунма цивппа бивчуну кьабивтун хъанай дур.
ОьрчIру каникуллайн бувксса чIумал миннангу, нитти-буттангу дуруччин аьркинссар цIарая мугъаятну бикIансса цаппара тIалавшиннарду. Спичкарду оьрчIал ка дияйсса кIанттурдай кьаритан къабучIиссар. ОьрчIру кьункьула дирхьуну цивппалу къатлуву кьабитан къабучIиссар. Мюрщисса оьрчIай къадагъа дишин аьркинссар токрал приборду ва газрал плиткарду ишла къадан. ЦукунчIав къабучIиссар къавтIи бичин.
Балики цIу ларчIсса иш ягу ци-дунугу ччучлачисса кьанкь, бугъ хIисав хьурча, оьвчин аьркинссар пожарный къуллугърайн 112 номерданий, бусан аьркинссар цIу ларчIсса кIанттул адрес ва цалла цIа-фамилия. ХIарачат бан аьркинссар цIу ларчIсса кIаная инсантал буккан бан. Агана цIу дахьра ларчIун духьурча ва инсаннал цIуллу-сагъшиврун зарал биянсса иш бакъахьурча пишакартал бияннин, му лещан дан хIарачат бан аьркинссар.
Ихтилат къуртал хьуну махъ Анвар Анваровлул ккаккан дурна цIу кIиллан дикIайхту, ччуччаврил кьанкь ягу бугъ буккайхту леххаву рутайсса прибор. МаслихIат бувна укунсса приборду дишин къатраву, хаснува мюрщисса оьрчIру бусса кIанай. Ванал бусласимунийн бувну, приборду ххирасса дакъар, ми гьарцаннаща ласун бюхълай бур.
Андриана Аьбдуллаева
