Москавлив дайдирхьунни Щалагу Аьрасатнал луттирдал 10-мур фестиваль «ЯтIул майдан». Аьрасатнал Луттирду итабакьайминнал ассоциация (АСКИ) хъанай дур Аьрасатнал регионнал павильондалул сакиншинначину, микку ккаккиялун бишин тIий бур регионнал басмаханардал итабавкьусса миллатирттал луттирду.
Дагъусттан Республика хъанахъиссар луттирдал фестивальданул даимансса гьурттучину.
Гьашину Дагъусттан Республикалул чулуха гьуртту хъанахъиссар «Эпоха» ва «Дагъусттан» басмаханарду, вайннул ккаккиялий дирхьуну дур Дагъусттаннал халкьуннал шаэр Сулайман Стальскийн 155 шин шаврин хас бувсса проект. Фестиваль шадлугърал тагьарданий тIитIаврий гьуртту хьуссар Дагъусттан Республикалул Информациялул ва печатьрал агентствалул каялувчи Аьбдуразакь Жамалуттинов.
– Хъунмасса барчаллагь жул хъунасса шаэр Сулайман Стальскийл юбилейран хас дурсса мероприятиялийн бучIаврихлу. ЖучIа хъанай бур яргсса ишру. КIурссану жу дуварду Фазу Аьлиевал юбилей, дукIу – Расул ХIамзатовлул юбилей, гьашину тIурча, Сулайман Стальскийл юбилейран хас дурсса шадлугъру. Жу вайннуй гьашиву къаданну, ттинияр тихуннайгу дулланну хъинсса аьдатравун дагьсса юбилейрал шадлугъирттан хас дурсса давуртту, – куна Жамалуттиновлул.
Махъ лавхъуна «Дагъусттан» басмаханалул каялувчи УмархIусман ХIажиевлулгу, мероприятие дачин дурну ивкIсса аьлимчу-физик ва жяматийсса ишккакку Низами АьбдулхIамидовлул, Мокавуллал ялапарлув Ольга Белозеровал ва цайминналгу.
Фестиваль лахъи лагантIиссар июньдалул 9-ннийнин.
Сакиншинначитурал бусаврийну, ккаккиялий бикIан тIий бур 100 азарунниха ливчусса луттирду.
ХIадур бувссар ХI.Аьдиловлул
