Вай гьантрай Ккурккуллал шяравугу тяхъану, гурну ларгунни Хъурдаккаврил байран. Гьашинусса хъузала ия Санинал арс Малик Гъужиев.

Москавлив, МахIачкъалалив, Хасаврай, Щурагь ялапар хъанахъисса шяраваллил халкь бакъассагу, Ккурккуллал байрандалийн бувкIун бия Ккуллал, Гъумучиял, Бархъаллал, КIундиннал, ЧIухъиял, Хьурттал, ЧIарттал шяраваллавасса чIявусса хъамалгу. Цурда Хъурдаккаврил байран жямат лагма лаган байсса, дусшиврул арарду цIакь дайсса байран дур. Ва буттал буттахъая шихуннай нанисса аьдат яшавриягу ххаришиву дикIай.
Хъузалал цалчинсса хъарасрал ща бишайхту, буллугъсса шин хьуннав, хъу-лухччи дюхъаннав, кьуру бугьансса чув, чувнащал щяикIансса хъамаличу чан къааннав тIисса дуаьрду дунни бусравсса шяравучу МахIаммад Сунгъуровлул.
Хъарас щуну, дуаьрду дурну махъ жагьилтурал ххяххан бунни дучри. ХьхьичIун бувкминнан дуллунни арцуйнусса бахшишру ва бартри. Шяраваллил майданнив ва спортплощадкалий хьунни лечаврил, ка дишаврил, тIанкI учаврил, турникрай гьаз шаврил бяст-ччаллу. ХьхьичIунсса кIанттурду бувгьуминнан дуллунни грамотартту ва медаллу, бартри, дунни цаймигу бахшишру – футболкарду, ттупру, мюрщултран – личIи-личIисса игрушкартту.
Бяст-ччал къуртал хьуну махъ хъунимигу, мюрщимигу бавтIунни авадансса ссупралухун. Шикку хъарас щаврил байрандалул тарихрая бусласисса, жяматраха дуаьрду дуллалисса ххуйсса ихтилатру бунни Ккурккуллал шаэр Ханича Аьлиевал, Роберт Магьдиевлул, Герман СалихIовлул, ЧIухъиял жяматрал вакилтурал.
Цала хъузалалгу дакIнихтунусса барчаллагь увкунни байран хъун дан, цала чIарав бацIан бувкIминнахь. Байран хъиннура ххуй дунни, жямат тяхъа-таза буккан бунни Ккурклиясса Айнал балайрдал. Жяматрал ванихьгу барчаллагь увкунни.
Бияннав байрандалул барачат щалагу Ккурккуллал жяматрайн.