Апрельданул 19-нний Ккуллал райцентрданий, Ваччиял шяраву, бусравсса хъамалгу бавтIун, лахъа-хъунсса даражалий «ЧаннацIуку» кказитрал редакциялул къатрал чIирайн лархъунни жяматийсса ва политикийсса ишккакку, Буттал КIанттул цIанийсса Хъун дяъвилул гьурттучи Амуттинов Михаил Амучиевичлул аьпа абад буллалисса мармарчарил ула.

«ЧаннацIуку» кказитрал гьану бивзсса ва чIярусса шиннардий редакторшиву дуллай ивкIсса Михаил Амуттиновлун 100 шин шаврин хас бувсса аьпалул мажлис хьунни кказитрал редакциялул къатрал хIаятраву. Мажлис байбишин хьхьичI, цинявппа гьурттучитурал тIутIив дирхьунни Михаиллул гьаттай.
Шикку гьуртту хьунни райондалул администрациялул бакIчи Шамил Рамазанов, Михаиллул арс Артур Амуттинов, райондалул жямат ва гъан-маччами.
Мажлис бачин бувну ия Да­гъусттаннал Чичултрал союзрал лакрал секциялул хъунама Супиян Оьмаров. Ванал гьарта-гьарзану бувсунни Михаил Амуттиновлул оьрмулул ва захIматрал ххуллия.

– ХIакьинусса кьини жува буру райондалий мудангу хIурмат-кьиматрайсса Михаил Амуттинов дакIнин утан бувкIун. Михаил увну ур 1924 шинал СунбатIуллал шяраву. ЧIяйннал шяраву дянивмур даражалул школагу къуртал бувну, дуклай ивкIун ур Ростов шагьрулийсса юристътал хIадур байсса школалий. Мунияр махъ Михаиллул Саратоврай бувккуну бур партиялул лавайсса даражалул школа, шиккува дуклай ивкIун ур журналистикалул отделениялий.

Ва къуртал бувну махъ, ванал захIматрал ххуллу байбивхьуну бур Ккуллал райондалул «ЧаннацIуку» кказитрал редакторшиврия. Михаил Амуттинов зий ивкIун ур райкомрал секретарьну, райисполкомрал председательну. Яргсса асарду кьабивтун бур Михаиллул ЧIяйннал ва СунбатIуллал школардай дарсру дихьлай ивкIсса ппурттувугу. ХIакьинусса кьинигу Михаиллул цIа бусраврай кIицI лаглайнма бур ванал дарсру дирхьусса оьрчIру.

Гьуртту хьуну ур Михаил Аму­ттинов Хъунмасса Буттал кIанттул цIанийсса дяъвилийгу.
Цува зий ивкIсса давурттай Михаиллул лайкь бувссар агьалинал чулухасса хIурмат ва кьимат. Ванал хIурмат мудангу лавайну бивкIссар райондалул каялувчитурачIа ва жяматрачIа, – увкунни Супиян Оьмаровлул.

Хъирив ихтилат бувна Шамил Рамазановлул. Ванал цала ихтилатраву дакIнин увтуна райондалул ахIвал-хIал хьхьичIунмай баву мурадрайсса гьарицагу давурттавух чялишсса гьурттушинна дуллай ивкIсса Михаиллул арс Амучи Амуттинов ва барчаллагь увкуна хIакьинусса кьинигу миллатрал иширттавух гьуртту хъана­хъисса Артур Амуттиновлухь.
– ХIакьину райондалул тарихраву дакIний личIансса иш хъана­хъиссар. Даврил опыт бусса, бюхъу-бажар бусса Михаил Амуттиновлул хIарачатрайн бувну, райондалул кказитрал даву сантирайн дуртун дур. Михаил Амуттинов ия гьарица чулуха цинявннан эбратрансса инсан. Райондалий цува зузисса давурттай Михаил мудангу хIурмат буну ивкIссар. Михаиллул ва ванал арсурваврал уздансса хасиятирттая бусансса чIявусса буссар.

Ванащал архIал зий бивкIминнал ванал цIа бусраврай ва хIурматрай дакъа кIицI къалагай. Барчаллагьрай ура ванал аьпа абад бансса сипталущал бувкминнайн ва цинявппагу гьурттушинна дан бувкIминнайн, – увкунни Шамил Рамазановлул.

Михаиллул оьрмулул ва захI­матрал ххуллун лавайсса кьимат бишлашисса ихтилатру бунни Аьра­сатнал Чичултрал союзрал член, «ЧаннацIуку» кказитрал редактор Абрек Къянчиевлул, захIматрал ветеран МахIмуд Аьлиловлул, 2-мур ЦIувкIуллал шяраваллил бакIчи Казбек Аьвдулкаримовлул, экономикалул элмурдал доктор, профессор Насруллагь Адамовлул, ванал учениктурал ва гъан-маччаминнал.

Ваччиял ва ЧIяйннал школардал дуклаки оьрчIал дурккунни «Уттуллал рахIмат» тIисса Михаил Амуттиновлул луттиравасса назмурду, увкунни ванал мукъурттийсса балайрду.
Цала буттал аьпа абад бан бувкIминнахь барчаллагь увкунни Артур Амуттиновлул.

Имара Саидова