Ларгсса нюжмардий Дагъусттаннал паччахIлугърал университетрал экологиялул институтрал студентътал ва преподавательталгу, Оьруснал географиялул обществалул Дагъусттанналмур отделениялул (ДО РГО) вакилталгу хьунабавкьунни республикалул Транспортрал ва ххуллурдал хозяйствалул министерствалул паччахIлугърал закупкардалсса буллалисса отделданул хъунама, Дагъусттаннал лайкь хьусса строитель Зиябуттин ХIажимирзаевлущал.

ГьунчIукьатIрал шяравасса Зиябуттин республикалийгу, дазул кьатIувгу машгьурну ур дунияллийсса чIявусса зунттурдал бакIурдийн, лахъазаннайн лавхъсса альпинист хIисаврай. Ва гьаз хьуну ур Кьиблалул Американавусса Аконкагуалийнгу, Африканавусса Килиманджаролийнгу, ряххийла гьаз хьуну ур Эльбрусрайнгу. Гьаннайсса, республикалул ххуллурдалсса буллалаврицIун, мажал бириярча, савсъсса багьадурахъаща бакъа битан къашайсса ххуллийн уккаймагу ур.

Студентътурал ванайн оьвчаврил гьанумур мурадгу ванал альпинистналмур даврицIун бавхIусса бия. Вайннал буллалисса суаллугу зунттал бакIурдийн лахълахъийни яла жапами захIматшивуртту цукунссар, ххуллийн бувкминнан чара бакъа ци кIулну бикIан аьркинссар тIисса мяъна-мурадрайсса бия.

– Студентътал хъинну гъирарай вичIи дирхьуну бия, буллалисса суаллу чIявуя, чIалай бия альпинизмалух хъуннасса къулагъас душиву. Аьрасатнаву, профессионал спортрал жура хIисаврай дикIу, инсантал бигьалагансса чаран хIисаврай дикIу, машгьурну дур альпинизм. Ттунна дакI даркьуна, жагьилтурал альпинизмалухун багьансса гъира ккавккун, ва спортрал личIиссава журар, инсаннаву чIярусса ххуй­сса хасиятру аьчгу, цIакьгу дуллалисса. Оьннасса чIун хьувкун, интернетравунгу бувххун шаппа-шаппа щябивкIуннияр, зунттавух буклай, сислай, саслай, кьянкьа-кьурчIи хъанай хъиннихха.

Альпинизмалул, спортрал итххяххаврицIун, жагьилтуран тарбия дуллалиссар. НигьачIисса иширавун агьманал цува цукунсса хасиятрал заллу уссарив, ссан учIисса уссарив ккаккан буллалиссар. Барчаллагьрай ура ттуйнма оьвкуну тIий студентътурахь ттунма кIулмур бусан, вайннаву зунттал бакIурдийн гьаз хъанансса гъира чантI учин буван, гъира буминнаву цIакь буван, – увкуна Зиябуттин ХIажимирзаевлул.

КIицI лаганна шиккува, Зия­буттин республикалий хъанахъисса иширттавух чялишну хIала уххайсса жяматийсса ишккаккугу, Ватан дазу дакъа ххирасса патриотгу ушиву. ДакI дарцIунугу бура, укун гьарца чулуха итххявхсса, чантI увкусса ва гьунар бусса инсантуращал­сса хьунабакьавуртту студентътуран мюнпатсса душиврий.

ПатIимат Рамазанова