Мартрал 25-нний Москавлив хьусса «Будущее Ро­ссии» ва «Вперед к мечте» тIисса Дунияллул халкьуннал творчествардал коллективирдал дянивсса конкурс-фестивальлай гьуртту хьуну, хьхьичIунсса кIану бувгьунни Республикалул музыкалул ва хореографиялул гимназия-интернатрал «Салам» ансамбльданул. Ва ххуллухьгу вайннаща бювхъунни лавайсса даражалий цала бюхъугу, гьунаргу ккаккан буван.

Москавлив хьусса конкурс-фестивальлай «Салам» ансамбльданул оьрчIал бувгьунни 6 хьхьичIунсса кIану.
– Укунсса мероприятиярттай гьуртту шавриву ва ансамбльданул биялсса опыт буссар. ОьрчIру сахIналийн бувктари, мудангу кьакъабагьавай хъатру ришлай хьунабакьай. Ва ппурттувугу цал архIал 6 хьхьичIунсса кIану бувгьунни вайннал. Ххуй­сса, яргсса къавтIавурттахлу коллективран дуллунни Гран-при, – буслай бур Каспийск шагьрулийсса Республикалул музыкалул ва хореографиялул гимназия-интернатрал директор, Хъусращиял шяравасса Абакарова Людмила Оьмаровна.
Людмилал 20-хъул шинну хьуну дур ва идаралий каялувшиву дуллай. Ва бур лавайсса даражалул пишакар, Аьрасатнал аьмсса кIулшивуртту дулаврил хIурмат бусса зузала, ДР-лул лайкь хьусса учитель.

Шиккува кIицI лаган, «Салам» ансамбльданул уттинингу, Аьрасатнал ва дунияллул халкьуннал даражалийсса конкурсирттай гьуртту хьуну, цимилагу хьхьичIунсса кIанттурду бувгьуссар. Коллективрал магьиршиву ккаккан дурссар Ашттарханнай, Туапселив, Сочилий, Санкт-Петербурграй, Азирбижаннаву, Къазахсттаннай, Румыннаву ва цаймигу билаятирттай ва шагьрурдай.

Имара Саидова