Мартрал 28-нний Лакрал райондалул Магьирлугърал къатлуву хьунни магьирлугърал зузалтрал байрандалуцIун дархIусса шадлугъ. Райондалул магьирлугъ хьхьичIуннай даврил ххуллий буллалисса захIматрахлу барчаллагьгу куну, зузалт барча бунни райондалул бакIчинал хъиривчув Явсупи ХIамзаевлул. КIицI лавгунни райондалий царагу мероприятие къашайшиву вайннал гьурттушинна дакъасса.

– Зул даву дур жаваблувшинна хъуннасса – ппухълунная нанисса аьдатру ва магьирлугъ, хъирив нанисса никиран ирсирай ядурну, хьхьичIуннай дуллалисса.
Зун хъунмасса барчаллагь райондалул агьали магьирлугърачIан кIункIу буллай бушиврухлу, райондалий хъанахъисса мероприятияртту чIюлу дуллай бушиврухлу, зула гьунардайну агьалинал дакIру аьчух дуллай, гьавас бутлай бушиврухлу, зула пишалийн дакI тIайлану зий бушиврухлу, – увкуна ванал.

Шинал лажиндарай жяматрал оьрмулуву чялишсса гьурттушиннагу дуллай, хьхьичIунну захIмат буллай бивкIсса зузалтран дуллуна ХIурматрал грамотартту.
Магьирлугърал зузалтралгу цивппа барча бан бувкIминнан барчаллагьран ккаккан дуруна ххаллилсса концерт.

ХIадур бувссар Зулайхат Тахакьаевал