ЦIуссалакрал райондалул бакIчи МаматIи ХIамзатов:
– ВахIшисса, рахIму-цIими бакъасса даву дунни! Цуксса кьурчIинугу, ва ялун бивсса оьзрулуву ливтIусса ва цIунцIияртту хьусса инсантурал сияхI ялу-ялун хъунна хъанай дур. Нюжмаркьини цала кулпатирттащал, оьрчIащал бигьалаган бувкIсса кулпатру рахIму бакъа кьатI бунни. МукIруну ура укунсса даву дурсса террористътуращал багьайсса ххуллу ласунссар тIий. ДакIнийхтуну жижара буллай ура бала-апатIраву оьрмурдацIа хьусса инсантурал мачча-гъанминнахь. Ва захIматсса ппурттуву Аьрасатнал агьали цачIун хьуну, оьбала-оьхIалшивурттайн къарщи бацIан аьркинссар.

ЦIуссалакрал райондалул бакIчинал цалчинма хъиривчув Султан ХIамзаев:
– Кьювкьу-кьадар дуллай ура арцул цIаний, багьана бакъасса мюрщисса оьрчIру, инсантал оьрмурдацIа бувсса, лайкь да­къасса тIул. Цимурцаннул жаваб дулунтIиссар террористътурал. КьурчIишиву кIидачIлай, жижара буллай ура цинявппагу гъан-маччанахь.
ЦIуссалакрал райондалул бакIчинал хъиривчув Макьсуд ХIамидов:
– Махъ бакъа, вахIшисса даву дурну дур. Сакиншинначитуращал ва даву дан бакIрайн ларсминнащал кьянкьасса ххуллу ласун аьркинссар. ХIакьину жугу зущал хажалатрай ва буруккинттарай буссару.

ЦIуссалакрал райондалул бакIчи Рустам Сулайманов:
– Инсантурал укунсса даву данссар тIий цукунчIав бакIравун бухлай бакъар. ВахIшисса жанавартралгума къадансса даву дунни. КьурчIишиву кIидачIлай, жижара буллай ура.
ЦIуссалакрал райондалул бакIчинал хъиривчув Арсен Гъазиев:
– Вай гьантрай «Крокус Сити Холл» концертрал залдануву хьусса якьамасса иширал инсантурал бакIру хьхьичIун дичин дунни. Буруккинттахун ва дардирдахун бивчунни багьана бакъасса инсантал. Кьадарсса тIул дурсса инсантурал мархха ххартI бан аьркинссар тIиссара.
ЦIуссалакрал (ЦIумина­лийсса) райондалул бакIчинал хъиривчув Амир Султанов:
– Цимил учирчангу, кьадарсса тIул дунни. ЧIалай дур ххуйну хIадургу хьуну дурсса теракт душиву. Тахсиркартуран закондалул ххуллий кьянкьасса танмихI бан аьркинссар.
ЦIуссалакрал райондалул Мажлисрал председатель Аслудин Аслудинов:
– Вих хъанай акъара укунсса даву дан бюхъайсса инсантал дунияллий бушиврийн. Аьраличувнал дяъвилул цIараву я жан дулайссар, я ххувшаву ласай­ссар. Аммарив, укунмасса инсантурайн ярагъ гьаз къабай­ссар, ялунгума миннан цащава шайсса кумаг бувайссар. Вайннал бувсса оьбала цукунчIав ба­гъишла къабитантIиссар. Гъан-маччаминнахьхьун ссавур дулуннав, жу зул чIарав буссару.

Имара Саидова