Мартрал 6-нний, Хъаннил байрандалуцIун бавхIуну, Лакрал райондалул Магьирлугърал къатлуву хьунни Кулпатрал шин дайдихьлахьисса шадлугъ. Яла агьамми хъамал ва байрандалий бия хIакьину Украиннал аьрщарай нанисса хасъсса аьралий операциялий арсру, ласру гьуртту хъанахъисса ва чIявусса оьрчIру бусса кулпатру.
Райондалул бакIчи Юсуп МахIаммадовлул кIицI лавгуна 2024 шин, Аьрасатнал Президентнал Указрайн бувну, жула билаятрай баян бувну бушиву Кулпатрал шинну. Ва сипта хъинчулий ккарккун душиву жула республикалий, кулпат паччахIлугърал ва жяматрал яла цIакьмур гьануну хъанай бушиврийн бувну.
– Гьарца шин жула билаятрай, Президентнал хIукмулийн бувну, хас дувай цумур-дунугу ца темалун. Уттинин баян бувну диркIсса шиннава кIилчин тикрал дунни так Кулпатрал шин.
Аьрасатнал тарих лявхъуния шийннай тачIав къадиркIссар кулпатрах хIакьину куннасса къулагъас. Жула Президент ляличIисса къулагъас дуллай ур кулпатрах. ЦIакьсса кулпат – вари оьрмулул багьа бакъасса ххазна.
Кулпат гьарзаманнай бивкIссар паччахIлугърал ва жяматрал ттарцIну. ХIакьину ва залдануву щябивкIун бур хасъсса аьралий операциялий гьуртту хъанахъиминнал кулпатру. Барчаллагь зун хъунмасса арсру ппухълуннал чувшиврий тарбия баврихлу», – увкуна Юсуп МахIаммадовлул.
Барча дурна бавтIминнахь Кулпатрал шин, хъаннихь барча дурна ялун нанисса байран.
Юсуп МахIаммадовлул кIицI лавгуна Кулпатрал шин дайдихьлахьисса республикалул шадлугърай Дагъусттаннал бакIчи Сергей Меликовлул цачIу оьрму бутлай ххюцIалла ва муниха лирчусса шинну хьусса чIявусса оьрчIру бусса кулпатирттавух кIицI лавгун бивкIшиву Лакрал райондалиясса МахIаммад ва Ххадижат Айгуновхъал кулпатгу. Укунсса кулпатирттайри билаят цIакьну бавцIуну бусса, – увкуна Юсуп МахIаммадовлул.
Ахирданий Магьирлугърал къатлул зузалтрал ва Гъумучиял Магьирлугърал школалул оьрчIал ккаккан дуруна концерт.
