Дунияллийцири хъаннил дакIру ххари дувай бахшиширттал, хъинсса мукъурттил, тIутIал кацIурдил.
Хъаннил байрангу, ялун нанисса Кулпатрал кьинигу барча дуван Ккуллал райондалул Культуралул ва бигьалагаврил центрданий хьунни ххаллилсса концерт.

Ва байрандалийн магьирлугърал зузалт унгу-унгуну хIадур хьуну бия – фойе чIюлу бувну бия тIутIайну ва суратирттайну, ккаккан дуллай бия барча бавурттащалсса, балайрдащалсса видеороликру, волонтертал бия гьарцагу хъамитайпалун тIутIал кацIру буллай.

Хъаннихь байран барча дуван бувкIун бия райондалул хъунаманал хъиривчув Анатолий Давдиев, ДР-лул Халкьуннал Мажлисрал депутатнал кумагчи Жамиля МахIаммадова, Хъаннил советрал председатель Марсижат Рамазанова. Барча бавурттайну къуртал хьуна байрандалул ца бутIа. Байрандалий личIисса аякьа дурна Украиннавусса хасъсса аьралий операциялий гьуртту хъанахъисса саллатIтурал ниттихъах, ссурваврах, хъанних.

Анатолий Давдиевлул ва Жамиля МахIаммадовал хъунмасса барчаллагь баян бувна вайннайн, Ватан ххирану тарбия бувсса арсваврахлу, уссурваврахлу ва ласурваврахлу. Вайннан буллуна конвертру, барча бавурттащалсса открыткартту, бахшишру ва тIутIив.
Хъирив магьирлугърал зузалтрал дайдирхьуна аьзизсса ниттихъан, амудадахъан, ссурвавран хас бувсса балайрдал программа. Залданувун бавтIцириннал хIурматрай хьунабавкьуна артистътал.

Ва кьини лахълахъисса махъругу, щаллу буллалисса балайрдугу бия хъаннил хIурматрансса, вай ххуйшиврул ва хъиншиврул лишанну бушиву бусласисса. Ттюнгъасса барча бавурттал ва цанма хас бувсса балайрдал шиккун бувкIцири хъаннил дакIру видуцIин дурна чаннасса асардал.
Концерт ярг дурна чIава артистътуралгу. Вай цивппагу Культуралул ва бигьалагаврил центрданул ва Магьирлугърал къатравусса кружокирттал гьурттучитал бия.
Байрандалийн хIадур дурсса концерт хъинсса бахшишну хьуна хъаннин.

Аминат АхIмадова