Февраль зурул 20-нний Дагъусттаннал Чичултрал союзрай хьунни лакрал литературалул секциялул заседание. Ва цIусса шин дайдирхьуния мукьах цалчисса заседание хъанай дур.

Секциялул каялувчи Супиян Оьмаровлул бувсуна гьашину цуку-цукунсса мероприятияртту дуван дакIний буссарив. «Дагъус­ттаннал халкьуннал чичу Мирза Давыдовлун 85 шин хъанахъиссар. Жура ванал юбилей лайкьсса даражалий тIайла дуккан аьркин­ссар. Гьашину лакрал цаймигу чичултрал юбилейрду дур. Вай Лакрал театрданущал, Поэзиялул театрданущал ва Миллатрал библиотекалущал, лак директорталну зузисса школардащал уртакьну дувантIиссар. Цуманал юбилей чув дуван дурив бази буллалисса программа цIакь дуванну. Чара бакъа Лаккуйгу дувантIиссар вай юбилейрдацIун дархIусса чIири-хъунсса мероприятияртту», – увкуна ванал.
Бувсуна Супияннул Да­гъус­ттаннал чичултрал справочникгу цIу буккан буван хIадур буллай бушиву, ялун бувксса чичултгу Союзравун кьамул бувантIишиву. Заседаниялий гьуртту хьунни кIицI ларгсса Союзрал каялувчи Марина Колюбакинагу (АхIмадова). Ванил бувсуна, чIумуцIун дархIусса захIматшивурттахгу къабурувгун, Союзрал даву ххуйсса даражалийн гьаз дувансса ххуллурдах- чараннах луглай бушиву, Дагъусттаннал хъунама Сергей Меликовгу литературалулгу, мазралгу бучIантIимуний дакIцIуцIаву дусса ушиву. «Да­гъусттаннал паччахIлугърал премиялийн так оьрус мазрайсса лу­ттирду ккаккан буллалаврийну тIайладакъашиву къадикIаншиврул, жу хIарачат буллай буру миллатрал мазрайсса луттирдугу личIину кка­ккан буллалисса хIукму цIакь бан. На нава оьрус миллатрал инсан бухьурчагу, куртIну миллатир­ттал литературалул вилаххав бувхсса инсанна, миллатрал литература гьаз дуваврил ххуллий хIарачатгу буллантIиссара», – увкуна ванил.
«ЧIявусса инсантал, ниттил мазрайсса литература чув лякъин хьунтIиссар тIий, цIухлан бикIай. Миллатирттал мазурдий­сса лу­ттирду бахлахисса ттучан чара бакъа аьркин багьлай бур, мунил ялувгу пикри бан аьркинни. Литературалул журналлал подписка лащин­сса даражалийсса хьунни. Районнал хъуниминнащал хьунабавкьуну, цукунсса тагьар дуссарив бувчIин бан аьркинни, миннангу, цайминнангу бувчIинхьуви лакку мазрайсса журналлу бучIан буллан, тIалав буллан аьркиншиву, жулла рувхIанийсса хъуслингу кIану лякъин аьркиншиву», – увкуна Мирза Давыдовлул.
Сукку бувна лакку мазрай чичаврил гьунар бусса жагьилталгу чялишну секциялул, союзрал давривух хIала буххан буваву мурадрай­сса масъаларттугу. Агьамсса суаллу гьаз буллалисса ихтилатру бувна халкьуннал чичултрал Мирза Давыдовлул, Руслан Башаевлул ва Хизри Илиясовлул, Аьра­сатнал Чичултрал союзрал члентурал Булбул Оьмариевал ва Бахттун Гъазиевал.

ПатIимат Рамазанова