Авгъаннава аьрал буккан бувну 35 шинан хасну

Ватан дуруччул Кьинилун хьунин Лакрал райондалий хьунни тамансса мероприятияртту. Дайдирхьунни ми Буттал кIанттул цIанийсса Хъунмасса дяъвилия зана къавхьуминнан дацIан дурсса гьайкалданучIа Авгъаннава совет аьрал буккан бувну 35 шинан хас дурсса митинграя.
Ваний гьуртту хьуна райондалул бакIчи Юсуп МахIаммадов, ДР-лул Халкьуннал Мажлисрал депутат Марат Илиясов, Авгъаннал иширттал гьурттучитал Аьбдулгъапур Оьмариев ва ХIу­сман Маммаев, идарарттал каялувчитал ва зузалт, учительтал ва дуклаки оьрчIру.
Митинграй гьуртту хъанахъиминнал тIутIив дирхьуна Хъун дяъвилия зана къавхьуминнан дацIан дурсса гьайкалдануцI, хасъсса аьралий операци­ялул цалчинсса Аьрасатн­ал Виричув НурмахIаммад ХIажимахIаммадовлул аьпалул улттуцI. Махъру лахълахъиминнал чIурчIав дуруна гьарца заманнайва жула билаятралгу, Дагъусттанналгу цIа диркIшиврий Ватандалул ххуллий жанну харж дан хIадурсса чIиваркIуннал.

– Жула Лакку билаятралгу хъуни бувну бур чIявусса вирттал. Миннавасса чIявуминнал цала виричувшиву ккаккан дурну дур яла оьттул ттур дуркмур дяъвилий. Бур миннал дянив дакьаву дусса заманнай цIа дуккан дурссагу. Миннал цIарду абадлий чирчуссар жула цIанихсса тарихраву. Хаснура барчаллагьрай дакIнийн дутан ччива Буттал кIанттул цIанийсса Хъун дяъвилул ник, цингу яла оьсса хIасратру духIан багьсса! Та никирал оьрму жунмасса эбратну хьун аьркинссар ялун нанисса ник Ватандалийн дакI тIайлану тарбия даврил ххуллий. ХIакьину тарихрал жунма буллай бур цIу-цIусса вирттал, ватан ххирашиву иширайну ккаккан буллалисса хIаписартал ва саллатI. Цивгу хIакьину, цала жагьилсса жаннай рахIму къабувну, хасъсса аьралий операциялий буручлай бур ватандалул мурадру, – увкуна Юсуп МахIаммадовлул.
Митинграй ихтилатру бувна Марат Илиясовлул, Авгъаннал иширттал гьурттучи Т1агьир Акаевлул.
Райондалул школардал ва Гъумучиял Магьирлугърал школалул оьрчIал барча бувна бавтIми, дурккуна ватандалухасса ва аьралитурахасса назмурду. Райондалул дуклаки оьрчIру чялишсса гьурттушинна дуллай бур гуманитар акциярдаву – чичлай бур ватандалул мурадру буручлачиминнал дакI дувансса чагъарду.
Муния махъ Авгъаннава совет аьрал буккан бувну 35 шин шаврин цIа кусса медальлу дуллуна та дяъвилул иширттаву гьуртту хьусса Аьбдулгъапур Оьмариевлун (рядовой, БахIикIлатусса), Т1агьир Акаевлун (майор, Арчуттиятусса), Кирамуттин АхIмадовлун (сержант, ЧIаратусса), Ситтикь Тумалаевлун (рядовой, ШавкIратусса), ХIусман Маммаевлун (подполковник, Гъумучатусса), Гьизбуллахь Рамазановлун (Гъумучатусса).

– Ларгунни 35 шин Авгъаннава жула аьрал буккан бувну. ХIакьину жула дянив бур та оьсса дяъвиллул цIаравух бувксса чумартсса, дакIгу, хасиятгу кьянкьасса инсантал. Барчаллагь учин ччай ура зухь райондалул жяматийсса иширттаву дуллалисса чялишсса гьурттушиндарахлу, ялун нанисса ник ватан ххирану ва рувхIанийну тарбия баврил ххуллий дуллалисса давурттаву. Му агьамсса давур зу дуллалисса. Дагъусттанлувтурал мудангу цIа диркIссар чувшиврул, чумартшиврул, – увкуна Юсуп МахIаммадовлул.
Ватандалул ххуллий жанну дуллуми дакIнийн бичин, митинграйн бавтIми ца минутIрайсса пахъ багьуна. Мероприятие къуртал дуруна аьралий темалун ва ватандалун хас бувсса балайрдал концертрайну.

«Вирттаврал Партарду»
Ватан дуруччул Кьини Хьурттал, Кьубиял, КIундиннал, Кумиял ва Ккурккуллал шяраваллал школардай тIиртIуна «Вирттаврал Партарду».
«Парта Героя» – ва бур ватандалул мурадру буруччаврил ххуллий чувшиву дурсса аьрасатлувтурая бусласисса, миннал суратирттащалсса дуклаки оьрчIансса стол.
Вайннул биялалийну дуклаки оьрчIан кIул хъанай бур ватандалул тарихраву цIа кьариртсса жула заманнул вирттаврая.
Акциялий гьуртту хъанахъиминнал дакIнийн бивчунни ватан дуруччаврил ххуллий жанну харж дурми.

Аьралитурал кулпатирттах ая­кьалий
Ватан дуруччул Кьинилул хьунин райондалул Магьирлугърал центрданий Юсуп МахIаммадов хьунаавкьунни Украиннал аьрщарай нанисса хасъсса аьралий операциялий гьуртту хъанахъиминнал кулпатирттащал.
Ваний гьуртту хьуна ДР-лул Халкьуннал Мажлисрал депутат Марат Илиясов, райондалул идарарттал каялувчитал.
Юсуп МахIаммадовлул барча дурна бавтIминнахь Ватан дуруччул Кьини. Бувсуна мобилизовать бувминнал кулпатирттах паччахIлугърал хъуннасса къулагъас дуллай душиву. Ххи бувна мукунсса кулпатирттансса кумагран райондалий хIасул бувну бушиву фонд #МЫВМЕСТЕ. КIицI лавгуна цува мудангу хIадурну ушиву мобилизовать бувминнал гъан-маччами кьамул бувну, миннал буруккинттах вичIигу дирхьуну, ми бюхъайссаксса щаллу бан.
– Жула оьрчIру биттур буллай буссар цала чувшиврул бурж, ватандалул мурадру буруччаврил ххуллий талай. Жунма цинявннан хIакьину жапану бур. Жунма багьлай бур хIакьину ватандалул мурадру буруччаврил ххуллий талатисса жула оьрчIругу, вайннал гъан-маччамигу ссахчIав мюхтажну къабитансса ххуллурду ляхълан. Зуща бюхъайссар, ччимур чIумал бувкIун, зула мурадру аьч бан, – увкуна райондалул бакIчинал.
Ахирданий мобилизовать бувминнал гъан-маччаминнан Юсуп МахIаммадовлул ва Марат Илиясовлул бувна арцуйнусса кумаг.
Ватан дуруччул Кьинилул хьун­ин КIувурдал шяраваллил бакIчи НасухI Ибрагьимов хьунаавкьунни хасъсса аьралий операциялий ватандалул мурадру буруччаврил ххуллий талатисса Мурад Гьаруновлул кулпатращал, щала шяраваллил агьулданул чулуха ванал бувна арцуйнусса кумаг. ХIакьину ва аьраличув ур кIилчин щаву дирну Ростоврай госпитальданий.

Бюхттулссар ватан дуруччул кьимат
Ватан дуруччул Кьинилун хас дурсса мероприятияртту хьунни райондалул школардайгу. Дуклаки оьрчIан ккаккан дуруна аьраличувнал гьарца кьинисса оьрмулия бусласисса, «ватан ххирашиву», «къучагъшиву», «аьраличувнал бурж» тIисса мукъурттил мяъна аьч дан кумаг буллалисса аьралий чIумалсса киноравасса бутIри, Совет ва Аьрасатнал аьралуннаясса видеороликру. Василий Лановойл «От героев былых времен» ва Шаманнул «Встанем» тIисса балайрдахун ккаккан дуруна Аьрасатнал вирттавран хас дурсса видеороликру.
Шиккува гьавасрай хьуна оьр­чI­ал дянивсса бяст-ччал «Гьурала, оьрчIрув». Шикку хъунмур къулагъас дурну дия аьралий оьрмулух. Ялун буккантIисса ватан дуруччулт бяст-ччаллий лахлай бия противогазру, ппивгу бувну, батIлай бия автоматру.

Палестиннавасса оьрчIру ххари бунни
Лакрал райондалул агьали дакI цIий, хажалатрай хъирив бавцIуну бур Палестиннал аьр­щарай нанисса дяъвилул. ДакIнийхтуну кIидачIлай бур диндалул уссурвавращал къювугу, хIасратгу. Вай гьантрай райондалул жагьилтурал гуманитар кумаг тIайла бувккунни дяъвилул цIарава жучIанма лихъа бувккун бувкIсса палестиннан. Ва акциялул сакиншинначину увккуна райондалул жагьилтурал иширттаву чялишсса гьурттушинна дуллалисса Тамерлан ХIабибуллаев.
Аслан МахIарамовлул дузал дуруна 220 азарда къурушран­сса дукиялул наборду. Ва ихIсандалул акциялийну лакрал жагьилтураща бювхъунни палестиннал оьрчIру ххари бан.

Зулайхат Тахакьаева