Ватан дуруччул Кьинилун хас дурсса мероприятияртту Ккуллал райондалий дайдирхьунни Вирттаврал Аллеялий хасъсса аьралий операциялул цалчинсса Аьрасатнал Виричув НурмахIаммад ХIажимахIаммадовлул мармарчарил улттучIа тIутIив дишаврия. Муния махъ дакIнийн бивчунни хасъсса аьралий операциялий ватандалул ххуллий чувшиврий жанну дуллусса райондалул жагьилтал. ТIутIив дирхьунни Буттал КIанттул цIанийсса Хъунмасса дяъвилул ххюягу Виричувнал, дунияллул халкьуннал дянивсса чапхунчитуращалсса талатавриву Аьрасатнал Вирттал хьусса Ися Мутаевлул ва Халид Мурачуевлул аьпалул улттачIагу.
Муния махъсса мероприятие хьунни райондалул магьирлугърал къатлуву. Райондалул бакIчи Шамил Рамазановлул барча дунни бавтIминнахь Ватан дуруччул кьини, кIицI ларгунни му чувшиврул ва яхIлил лишанну. ЧIа увкунни буллугъсса ва дакьаврийсса оьрму.
Украиннал аьрщарай нанисса хасъсса аьралий операциялий ватандалул ххуллий чувшиврий жанну дуллуминнал ниттихъахь ва гъан-маччаминнахь дакI дансса махъругу куну, дакIнийн бивчунни Буттал КIанттул цIанийсса Хъунмасса дяъвилий жанну дуллуми, Авгъаннал дяъвилий ливтIуми. КIицI лавгунни циксса шинну гьарчагу, жула ялун дуркIсса никирангу хъама- къабитантIишиву цала жанну ватандалия ххира къадурми.
Ватандалул ххуллий чувшиврий жанну дуллумигу дакIнийн бивчуну, бавтIминнахь байран барча дуллай, Лакрал ва Ккуллал районнал аьралий комиссариатрал вакил Ажуб Юсуповлул цала ихтилат къуртал бунни И.В. Сталиннул мукъурттийну. : «Жува тIайламунихлуру талатисса! Душман ххит увантIиссар! Ххувшаву журар ласунтIисса!
Муния махъ дуклаки оьрчIал дурккунни вирттавраясса назмурду. Магьирлугърал зузалтрал ккаккан дурунни ватандалун ва аьралитуран хас бувсса балайрдал концерт.
Ватандалул ххуллий жанну дуллуминнан хас дурсса мероприятияртту хьунни райондалул школарттай ва библиотекарттайгу.
Кьуния ххюра тIюваяту зувиллий ххюва къурши СВО-лийн ссайгъатран
Кьуния ххюра тIюва дусса ЦIущардал жяматрал Ватан дуруччул кьинилул хьунин хасъсса аьралий операциялий ватандалул мурадру буруччаврил ххуллий талатисса дагъусттаннал аьралитуран тIайла бувккунни гуманитар кумаграл зувиллий ххюва къурши. Ва акциялул сиптачиталгу хьуну бур ЦIущардал школалул учительтал.
Ссайгъатрал къуршаву вайннал дирхьуну дур гъилисса лаххия, кьаркьдикI, зия къашайсса дукра, гьарца кьини аьркин дагьайсса затру. Къуршал ялувгу чивчуну бур аьралитурал дакIурдивун гьавас бутансса махъру: «Ух уван къашайсса оьруснал солдат! Барчаллагь зун зул къучагъшиврухлу, виричувшивурттахлу, Аьрасат ххирашиврухлу! Зана бувара фашизмалуцIа марцI буккан бувсса тарих! Жун ххирассар гьарцагу солдат! Вихну буру зул ххувшаврийн! Дуаьрттайгу буру зу сагъ-саламатну зана хьуннав тIий».
