Ссапар Аьлиевич жул театрданул хIакьсса, гъансса ва вихшаласса дус-ихтиварди. Цувгу илданун кIулссар мяърипат ду­сса, интеллигентсса, аькьлу-кIулши гьарза-гьартасса, театрданул оьрмулуцIун бавхIусса гьарца ишираву чIарав ацIан хIадурсса ла­ккучув хIисаврай.

Ссапар Аьлиевичлул театрданущалсса гъансса дусшиву дайдирхьуссар щала билаятран захIматсса 90-ку шиннардий, театрдал бюджет бувагу къабивкIсса ппурттуву. Тай шиннардий ванал ца яла хъунмур хъар цайнна ларсъссар Мариян Илиясовал сипталийну щурущи буллай байбивхьусса М. Аьлиевлул «ПартIу ПатIима» спектакль бишаврил ялув­сса проект дузрайн дуккан давриву. Ялагу, 2001 шинал, ванал цайнма лавсъссар С. Кьасумовлул «ЛухIи кьини» тIисса пьесалийнусса спектакль бишинсса щала харжигу. Вания тихунмайгу чIярусса шиннардил манзилданий ванал ка-кумаграцIух цIу буккан бувссар театрданул материал-база: декорацияртту, жанахIравунсса интерьер, реквизит, сахIналул костюмру, музыкалул инструментру, ванала кумаграцIух дузрайн дуркссар театрданул гастроллал проектругу.

Мунищала архIал тай шиннардий, щала билаятрайва зурдардий харжру къабуллалисса чIумал, Ссапар Аьлиевичлул хIасул бувссар Попечительшиврул совет ва ванал сипталийну му советравун бухлахиминнал лахъисса чIумул мутталий зуруя зуруйн арцуйнусса кумаг буллай бивкIссар театрданул арти­стътуран. Мунийну бювхъу­ссар театрданул творчестволул потенциал сахла бан, яхьунсса арцу ля­къиншиврул, цала пишардугу кьабивтун, чIявусса интеллигенция тили-хъили хьусса ппурттуву.
ХIакьинусса кьинигу Ссапар Аьлиевич шайсса кумаг буллай уссар оьрмулул захIматсса тагьардануву ливчIсса артистътуран ва театрданул зузалтран.
Хаснува кIицI лаган ччива театрданул 80 шинал юбилей дусса ппурттуву ванал сипталийну, Сиражуттин Илиясовлущал республикалул идарарттай каялувшиву дуллалисса лак, ишбажаранчитал ва театрданий дакI цIуцIисса инсанталгу лагма лаган бувну, лайкьсса даражалий шадлугъругу тIайла дурккун, театрданул коллективран арцуйну ка-кумаг бувну бивкIшиву. Театрал магьирлугърал кьимат кIулсса инсан ва дакI тIайласса тамашачи хIисаврай, Ссапар Аьлие­вич хъунмасса кумаг буллай уссар театрданувун тамашачитал кIункIу баврил ххуллийгу.
ДакIнийхтуну барча тIий жула хIурмат лавайсса Ссапар Аьлиевичлухь юбилей, чIа тIий буру цIакьсса цIуллушиву. Оьрмулул уччиннин итаннав ина! БацIаннав арулххуттай ина вила миллатран буллалимур!

Бадрижат МахIаммадхIажиева,
Лакрал театрданул каялувчи