Республикалул Поэзиялул театрдануву хьунни Аьрасатнал искусствардал лайкь хьусса ишккакку, пианист, профессор Хан Башировлун «Благородство и милосердие» тIисса мусил медаль дуллалисса мажлис. Му тапшур дунни «Российский детский фонд» тIисса Дагъусттаннайсса отделениелул председатель, генерал-полковник М. Танкаевлул цIанийсса жагьилтал патриот зумуну тарбия баврил фондрал председатель ХIасанхIусайн Аьбдулжалиловлул.
«Благородство и милосердие» тIисса мусил медаль хIасул дурну дур «Аьрасатнал оьрчIал фондрал». Культура ва искусство хьхьичIуннай давриву бакъассагу, билаятрал оьрчIал мурадру буручлачисса жяматийсса иширттавух чялишсса гьурттушинна даврихлуну Фондрал хIукму бувну бур бусравсса награда Хан Башировлун дулун. Фондрал давривух гьуртту хъанай дур искусстволул ва личIи-личIисса милллатирттал жяматийсса ишккаккултрал суккушиннарду.
Шиккува кIицI лаган, Республикалул кьатIувсса ихIсандалул мероприятиярттай Хан Мирзаханович уттинингу цимилгу гьуртту хьуссар ва лайкьсса даражалий ккаккан дурссар Дагъусттаннал музыкалул искусство.
ДакIнийхтуну барча дуллай буру Хан Мирзахановичлул ирглийсса награда.
ЧIа тIий буру цIакьсса цIуллушиву, гихунмайгу зун-захIмат буллансса каши ва кьудрат.
Имара Саидова
