Цалчинмур ЦIувкIратусса пагьламан Камил Мамаевлул уттигу Аьрасатнал халкь хIайран бунни, ванал гьунардания, ирглийсса трюкрая чичлай бур, буслай бур билаятрал прессалий, радио-телевидениялий.
Буттал шяраву, БурчIанниялу тIисса кIанай, ца зунттуя гамур зунттуйн архъан дархIуну, ванал пагьламан лахъан дунни Ххувшарил ЯтIул ттугълищалсса танк. Балжину ва даврия укун бувсунни Камиллул:
«Гьашину Буттал кIанттул цIанийсса Хъунмасса дяъвилий Ххувшаву ларсун 80 шин хъанай духьувкун, ттун ччай бия виртталсса ппухълуннал – фронтовиктурал аьпалун ва Ххувшаврил савлугъран ябацIансса трюк дуван. Хъинну пикри буллай ивкIра, цукунсса даву дурну хъиннивав тIий. Ххувшаврил ттугълищал на Москавлив лавхъра хьхьуттайх, мотоциклетрай лавхъра, гьавалул шардануцIун пагьламан дархIуну лавхъра, аьркинни цIусса трюк. ЧIярусса проектру щуруй дия бакIраву, авцIура танкрай, бусалардавун дагьсса совет танкрай. Ттулла пагьламан-танкран цIагу дизав Бусала. Дував Т-34 совет танкрал аналог, дачIи тонна кIушиврул дусса макет.
На хъунагу, тарбиягу хьуссара совет вирттаврал чувшиврул дарсирдай. Ттун танк хьхьуттайн гьаз даврийнугу яла-яла ва хьхьуттай хьхьичIуннай дачин даврийнугу ккаккан бан ччай бия Совет армиялул ХхувшавричIансса захIматсса ххуллу. Тележурналистътурахьгу увкуссия, ттун танк хьхьуттайх ларгссар тIисса калима къакьамулссар, бигьанна ларгсса ххай къабикIан, танк хьхьуттайх лари-лархъсса куну. Ва ялагу, Ххувшаврил ттугъ — совет агьалинал яхIлил, кьуватрал лишанни. ЛахIан бан, бух бан къабавцIусса агьалинал кутак ккаккан дуллалисса. МуницIухва, Ххувшаврил ттугълил жунма дакIнин бутлатиссар, дуниял нацизмалуцIа марцI дуваврил ххуллий совет агьалинал чIявусса оь экьи бувтIушивугу. На ЯтIул ттугълих хъуннасса къулагъас дуллалиссагу, ялун нанисса никирангу Ттугълил хIурмат бикIаншиврулла.
Сайки гьарца интервьюраву кIицI лагав вихь кIицI лавгмур. Ххувшаврил Ттугъ кIира-шанна никирал цашиврул ва куннал кув бугьаврил лишанну хъанахъишиву. Ца никирал гамур никирайн тапшур буллалисса ххазина хъанахъишиву. На ЦIувкIрав Пагьламантурал школалул тренерну ура. Ттун, оьрчIан хьхьуттайх лахъан лахьхьин буваврицIун, миннаву патриот асарду чантI учин, цIакь буван ччай бур. Махъсса ппурттуву на чIявусса шагьрурдайн ивра, личIи-личIисса мероприятиярттай гьуртту хьура, патриот асардал дакI гьузиххин дуллалисса. Агар жува оьрчIругу патриот асарду хьхьичIунну тарбия булларча, минначIагу кьадрулий дикIантIиссар кьиматрай дикIан аьркинмур», – тIий ур Камил.
Танк хьхьуттайх лахъан даннин, ванан биялсса захIмат бишин багьну бур хIадуршиннараха зий. Ца зунттуя гамунийн хьхьару хъинну саргъунну бахIин багьлай бивкIун бур, цахъисрагу даччин къахьунсса даражалий. Хасну кIа кIану язи бугьаврил хIакъиравугу укун увкунни:
«Гьай-гьай, на зунттал лагма увкра, къулаймур кIану ххал буллай. Ххуйсса кIанттурду чан бакъар зунттаву. Так Щуну- Зунтту чIалачIисса кIану ччай бия. Щунуя ПпабакIул чулиннай пагьламангу дахIин. Авкьатсса зунттал панорама итталун дагьансса куццуй», – тIий ур. Бувсунни Камиллул цалва хияллаягу: Эльбрус -Зунттуйн лахъансса, Курскалийгу танк пагьламан лахъан дувансса ва цIанихсса шяравучунал, Совет Союзрал кIийла Виричу АхIмад-Хан Султаннул аьпалул хIурматран самолетрайгу ца трюк ккаккан дувансса.
Ва оьрмулувугу, ци захIматшивуртту дунугу, мадад къабуллай, танк куна хьхьичIунай нанисса, гъалбурцIил хъапа бусса жагьил ур. ТIайлабацIу баннав!
Бусан ливчIунни, Дагъусттаннал бакIчинал грантру ларсъсса проектру бартдигьаврил хIасиллу ххал диргьуну, ххуйсса даражалий бартдиргьусса ххюра проектравух Камиллул «ТаразалучIансса цалчинсса ша» тIисса проектгу душиву.
Гъилахъан ва хьхьирил пляжрай пагьламангу дархIуну, оьрчIан ва хъуниминнан пагьламан лахъан лахьхьин буллай уссия. Ванал мастер-классирдайн гьар кьини тамансса агьлу батIайва.
«Ттул проект Топравусса ххюннивун дагьаву – му на ттулла даву дюрхъуну дуллай ушивруцIун, пагьламантурал искусствалухгу къулагъас душиврул барашин дуллалисса давур. Хъунмур мурадвагу пагьламаншиву цIу дуккан давур, машгьур давур», – тIий ур Камил.
ПатIимат Рамазанова
