Вай гьантрай «Илчи» кказитрал хъунама редактор Руслан Къардашовлул сипталий жул зузалтрал аьрххи багьунни ЧIарттал шяравун.

Жу бивру «Зунттаву гъи» тIисса аьдатравун дагьсса Дялахърулул центрданийн, хьунабавкьуру ва ххаллилсса даврил сиптачи ва сакиншинначи, Центрданул каялувчи, гьунар бусса жагьил, художник-реставратор Калеб Шмидтлущал. Школалул къатраву тIивтIусса Центргу ккаккан бувну, ванал бувсунни шиккусса программалия. Дялахърулул центрданийсса оьрчIру чIявуми шиккува шяраву ялапар хъанахъисса бур. Бур мукунма Аьрасатнал шагьрурдая – Москавлия, Санкт-Петербурглия, Краснодардая бувкIсса оьрчIругу.

Центрданийсса кIулши­вурттал программа авадансса, гьарзат хIисавравун ларсун сакин дурсса дур. Шяраваллил оьрчIру творчествалул ххуллийн кIункIу буллай, ва чулухунмай итххяххан буллай бур, шагьрурдая бувкIми тIурча, лахьлай бур ниттил маз. Центрданий бур оьрчIал живописьрал, театрданул искусствалул, мукунна кинематографиялул гьанурду лахьлахьисса бутIагу. Шиккусса оьрчIал, лавхьхьумур ишла бувну, ларсун дур фильм. Му «Зунттавусса гъи» тIисса цала официал лажиндарай ккаккан дансса пикри бур.

Кьунниялай шикку зий бикIай лакку мазрал клуб. Центрданул педагогтурал тIуркIурдайну лахьхьин буллай бур оьрчIан ниттил маз. ОьрчIру гьарица чулухунмай итххяххан баву мурадрай шиккун бувцуну бия личIи-личIисса преподавательтал. Театрданул искусство лахьхьин дан увкIун ия Зарх Леонид Леонидович, къавтIавуртту (лезгинка) лахьхьин дан бувцуну бия Санаев ХIасан Ярагъиевич ва Трескина Дарья Дмитриевна, литературалул клуб бачин бувну ия Невмержицкий Александр Дмитриевич, киномастерская – Старков Кирилл Алексеевич. Зий бия шиччавасса педагогталгу.
Жу бувкIсса чIумал шикку дахьра къуртал хьуну дия кьатIув, тIивтIусса кIанттурдай хIайвантрал суратру дихьлахьисса дарс (пленэр по животным). Кувссайх дирхьуну дия кьакьан кьариртсса оьрчIал дирхьусса суратру.
– Умуд бур смена къуртал хьуннин жула оьрчIаща шикку дурсса художествалул давуртту ккаккан дан бюхъанссар тIисса, – тIий ур Калеб Шмидт.

 
КIицI лаган, Центрданий бия, хьхьичIва тихунмай бивзун, Турциянаву ялапар хъанахъисса, ЧIарттал шяравасса наслулул оьрчIругу.
Калеблул ккаккан дунни жун ЧIарттал шяравусса 17-мур ттуршукулул дянивсса чIумул архитектуралул гьайкалгу: къуппа магъи дусса чак бай къатта, ххуллулсса хьхьу рутан бацIайсса къатта. ЦIанасса чIумалнин яхьуну бур так цаппарасса къатри. ЧIарттал жяматран пикри бур цала арцух шикку реконструкцияртту дан.
– Жул мурад буттал шяраву гьан бувсса гьантри оьрчIан хъунмасса хIаллай ва тIааьнну дакIний личIавур. Мукун хьурча, оьрчIру ялагу кIункIу тIунтIиссар буттал аьрщарайн, – тIий ур Калеб. Ванал бусласимунийн бувну, ЧIарттал шяраваллин 550 шин дур.
Живописьрал преподавательтал буслай бур, шяраву ялапар хъанахъисса оьрчIал шагьрулийминнаяр ххуйну дишай хIайвантрал суратру тIий.

 
Жу бувкIсса чIумал, школалул хIаятраву цIарай бизан хIадур бувну бия хъунисса къазанну. МаркIачIанмай Центрданийн лагма щархъая хъамал бучIантIиссар тIий бия. Ялугьлай бия мукунма оьрчIал нитти-буттах ва шагьрурдая бувкIсса ЧIарттал жяматрах.
– Ттун вай хъуни къазанну оьрчIнияцIава, шяраву хъуни хъатIай бизлай дакIнийри. ЯлунчIил бувкIмигу ЧIарттал пулавлий хъамалу бан хIадурссару, – тIий ур Калеб.
ЯлунчIилгу бучIан махъгу буллуну, Калеблухьгу дуллалимур дюхъаннав куну, тIааьнсса асардащал лавгру жу хъамал ххирасса ЧIарттал шярава.
Аргъ дизаннав зул щарний, дуллалимуницIун Заннал кабакьиннав.

 
Андриана Аьбдуллаева