Гьарица шяраву бикIай цинявннан бусравсса, ляличIинура сий дусса инсантал. Мукунсса хIурмат-иззатгу миннал цала инсаншиврийну, мукъуйну, канийну цаманан кумаг бан, чIарав бацIан чялишсса бушиврийну лайкь бувну бур.  

Ваччиял жяматран мукун­сса­ инсанну хьуссар ГьунчIукьатIрал шяравасса Аьбдул-Барис ва Марзи Буттаевхъал душ Бану ХIамзатова. Бану бур Буттал кIанттул цIанийсса Хъунмасса дяъвилул оьрчIшиву зерххусса никираясса. Ванин ххюра шин хьусса чIумал, дяъвилийн лавгун, зана къавхьуну ур ппу. Му ятIа-тIар бакъа акъа хьуну ур. Вайннал кулпат му чIумал душманнал лавсъсса Пятигорскалий ялапар хъанай бивкIун бур.

Пиша язи бугьайсса чIумувун бивукун, медициналул кIул­шивур­ттугу ларсун, цила оьрмулул чIяруми шинну Банул жяматрал цIуллу-сагъшиврул цIаний захIмат бихьлай гьан дурну дур. Ваччатусса ХIамзатлун щар хьуну, Ваччиял шяраваллил амбулаториялий зий, жяматран бусрав хьуну бур. Ласгу ччяни аьпалухьхьун лавгун, Банун шанмагу оьрчI цинмалу ччаннай бацIан буллан багьну бур.
Жаваблувсса даврил къайгъурду, азарахъул пациентътал, шану къалавхъсса хьхьурду…Сайки 50 шин дурну дур ванил Ваччиял амбулаториялий зий. Шяраваллил кIанттурдай медсестрахъан чIявумур чIумал цаламур пишалул къайгъурдацIун цаймигу бигарду бартбигьлан багьай. Мукун Банунгу хIакиннал кIулшивуртту ва опыт аьркинсса давуртту дуллан багьайсса бивкIун бур. Къашайшалт кьамулгу бувну, аьркинсса кумаггу бувну, миннал цIуллу-сагъшиврул тагьарданул ялувгу бавцIуну, хъуннасса хъар лахълай бивкIун бур. Инсаннан кумаг аьркинсса чIумал, ванил ссахчIав къабурувгун, хьхьу-кьини, бигьалагай кьинирду, байранну къаувкуну, га цIана бувкIун, кумаг байсса бивкIун бур. Акъахьунссар шяраву цаягу инсан ванил кумаг къабувсса. Ва зузисса шиннардий шяраваллил амбулаториялийн бувкIхьунссар цимирагу никирал агьлу. Банул хъин бувссар цикссагу мюрщи оьрчIру, кумаг бувссар хъуниминнан, аякьа дурссар бугьараминнаха. Шяраваллил инсантураща чIявуминнаща учин бюхъантIиссар: Банул кумаг бувссар ттунгу, ттул оьрчIангу, оьрчIал оьрчIангу, куну. Ванил лайкь бунни жяматрал хIурмат лавайсса даражалул пишакар бушиврийну бакъассагу, цила инсаншиврийну, рахIму-цIими бушиврийнугу. Ва бия дакI хъинсса, инсаннал къюву кIидачIин, дакIниймур лаласун, нахIусса мукъуйну инсан рахIат уккан ан кIулсса. Ца-ца чIумал вихшала дусса инсаннал бувсъсса нахIусса мукъул дарувралнияр кумаг байссар. Шяраваллил кIанттурдай зузисса медсестралул даву ляличIинура захIматсса ва жаваблувсса дикIай. Вайннан личIи-личIисса шартIирдай зун багьай.
ЧIярусса шиннардил лажиндарай, жяматрал цIуллу-сагъшиврул къаралданий бавцIуну, Бану дакI марцIну бартбигьлай бия цила пишалул буржру. МахIачкъалалив бивзун махъгу чIярусса шиннардий Бану зий бивкIун бур 1-мур МахIачкъалаллал поликлиникалий флюрографиялул кабинетраву. Агьалинал цIуллу-сагъшиврул къаралданий бавцIуну бивхьусса захIматрахлу Бану лайкь хьуну бур ЗахIматрал ордендалун.

Вай гьантрай ванил оьрмулул 90 шин бартлаглай дур. Шяраваллил жяматрал цIуллу-сагъшиврул цIаний ванил бивхьусса захIмат гьарнан дакIний бур. Мунин бивщусса яла лаваймур кьиматгу ванил кумаг бувсса инсантурал барчаллагьри. ХхюцIалла шин агьалинал къайгъурдай – му ккалли бансса ишри. Му щаллусса оьрмур шяраваллил жяматран хас бувсса. ЖяматрачIагу, гъан-маччаначIагу ванил кьад­ру-кьимат хъунмасса бур, хIа­кьи­нусса кьинигу ванийн дакI­нийхтуну барчаллагьрай бур. ЦIана Бану цила чIивимур душ Оксанащал Москавлив ялапар хъанай бур. Шиккува ялапар хъанахъисса хъунмур душ Аминагу ччя-ччяни бияй ниттичIан. Душру ниттихсса аякьа чан хьун къабацIай.
ХIурмат бусса Бану Аьбдул-Барисовна!
ДакIнийхтуну оьрмулул юбилейгу барча дуллай, барчаллагь тIий буру вихь жяматрал цIаний бивхьусса захIматрахлу, инсаншиврухлу, узданшиврухлу. Шяраваллил халкьуннан ина так медициналул зузала бакъаявча, хъинсса дусгу, гъанчугу, маслихIатчигу бияв.
ЧIа тIий буру вин цIуллушиву, чIярусса ххаришивуртту ва хъиншивуртту. Мукунма бусравну, хIурматрай гьаннав вил гихунмайсса оьрмугу. ОьрчIал ххари буллай битаннав,– чичлай бур щалагу жяматрал цIания шяраваллил вакилтал.
Жугу барча тIий буру ва ххаллилсса, бусравсса лакку инсаннахь оьрмулул юбилей. Заннал кьамул даннав циняв виха дур­сса дуаьрду.