Ноябрьданул 13-нний МахIач­­къалалив А.В.Вишнев­скийл цIаний­сса Республикалул клиникалул азарханалий хьунни «Гаджиевские чтения. Терапия: междисциплинарные аспекты» тIисса региондалул элмийсса ва практикалул конференция.

Ва хас дурну дия медициналул элмурдал доктор, профессор ХIажиев Хайруттин Апаннинал арснан, цувгу авцIуну ивкIсса Дагъусттаннал терапевтътурал элмийсса обществалул бакIщаращуцI ва чIярусса шиннардил мутталий каялувшиву дуллай ивкIсса Дагъусттаннал паччахIлугърал медициналул университетрал госпитальный терапиялул кафедралий.

Конференциялий гьуртту хьунни ДГМУ-лул личIи-личIисса направлениярттал ва пишардал хIакинтал, преподавательтал.
Конференция дайдихьлахьисса, ваний гьуртту хъанахъиминнахь ДГМУ-лул ректор Висампаша Ханалиевлул цIаниясса ихтилат бунни ДГМУ-лул госпитальный терапиялул кафедралул профессор, Аьрасатнал терапевтътурал медициналул элмийсса обществалул ва Инфекциялул дакъасса азардал профилактикалул Аьрасатнал обществалул Дагъусттаннал региондалул отделениялул председатель Сулайман Маммаевлул. Ванал бувсунни Хайруттин ХIажиевлул бивтсса ххаллилсса оьрмулул ххуллия, Дагъусттаннал терапиялул къуллугъ сакин бавриву мунал бувсса ххишала бакъа хъунмасса захIматрая. Хайруттин Эфендиевичлул каялувшиндаралу хIадур увссар медициналул элмурдал ряха доктор ва ацIния ххюя кандидат.

Конференциялий гьаз бунни личIи-личIисса масъалартту, бунни личIи-личIисса докладру. Сулайман Маммаевлул цалва бунни «Кишечная микробиота и метаболическое здоровье» тIисса цIанилусса доклад. Докладру мукунма бунни медициналул элмурдал кандидат, ДГМУ-лул ППС ва ФПК-лул терапиялул кафедралул ассистент Сабина Шамиловал, ДГМУ-лул госпитальный терапиялул кафедралул хъунмур, медициналул элмурдал кандидат Жамиля Оьмаровал, хIакин-гастроэнтеролог, медициналул элмурдал кандидат, вузрал терапиялул кафедралул ассистент Амина Бейбалаевал ва цайминнал.

Конференциялул программалуву хъунмасса ва ляличIисса кIану ккаккан бувну бия Дагъусттаннал терапиялул патриархнан ккаллисса Хайруттин ХIажиевлуясса дакIнинбичавурттан. Ва кьини залданувун увкIсса гьарцагу инсаннал ванаяту бусанмургу чан бакъая. Ванал элмийсса каялувшиндаралу кандидатшиврийнсса диссертацияртту дурурччусса ДГМУ-лул госпитальный терапиялул кафедралул доцентътал Сажид Загълиевлулгу, Асият Каримовалгу бувсунни чIявусса затру. Профессор, наставник, Заннала хIакинну ляхъан увсса Хайруттин ХIажиевлуясса аьпа уттавана бур ванал дарсру дирхьуминнаву, ванал щаллу дурсса элмийсса давурттаву, ДГМУ-лул госпитальный терапиялул кафедралул аьдатирттаву. Гьарца шинал шайсса «Гаджиевские чтения» конференциягу терапиялувусса агьамсса масъалартту ххал бигьинсса ва ванил гьану бизавриву хьхьичIххуттай авцIуну ивкIсса Хайруттин Эфендиевич цал ххишалану дакIнин утансса ххаллилсса давур.

Бадрижамал Аьлиева