Сентябрьданул 8-нний «Дагестан» РИА-лул редакциялий хьунни ирглийсса пресс-конференция Дагъусттаннайсса «Справедливая Россия» партиялул отделениялул вакилтуращалсса. Ва хас дурну дия ЖКХ-лул багьри гьаз шаврин.

Шикку гьуртту хьунни ДР-лул Халкьуннал Мажлисрал председательнал хъиривчу, «Справедливая Россия» Партиялул Дагъусттаннайсса отделениялул советрал бюрорал председатель Камил Давдиев, «Молодежь Справедливой России» тIисса партиялул отделениялул председатель Агъалар Юзбеков, ДР-лул Халкьуннал МажлисрацIунсса Жагьилтурал парламентрал член Тамара АхIмадова.

Камил Давдиевлул бусунни ЖКХ-лул тарифру инфляциялул бущилуяр ялтту дуклай душиву. Махъсса шиннардий щалагу билаятрайсса коммунал хIаллихшиннардал тарифирттах бурувгун, багьри кIилийну лахъ хьуну бушиву. Ванал кIицI лавгунни гьашинусса шинал ЖКХ-лул багьри кIийла гьаз бувшиву. Вай масъалартту Дагъусттаннайгу яла цIурювкьуми бур. Ларайсса тарифирттал чулуха Щалагу Аьрасатнал рейтинграй Дагъусттан кIилчинмур ххуттай бур. Ставропольлал крайрай ЖКХ-лул хIаллихшиннардал багьри 22% лахъ хьуну бур, Дагъусттаннай вайннуяр чансса ялавайсса, 19% бивсса бур. Республикалул агьалинал харжру ва пенсияртту хIисавравун ласурчан, коммунал хIаллихшиннардахсса багьри хъинну хъунисса бушиврун ккаллину бур.

Вай масъаларттал хIакъираву бувчIин бавуртту дуллай, Камил Давдиевлул кIицI лавгунни, инсантурал оьрмулул шартIру къулай даву мурадрай, партиялул сукку дуллалисса сиптарду. МуницIун бавхIуну, цIанасса ппурттуву «Справедливая Россия» партиялул вакилтурал Дагъусттаннай 20 азарунния ливчусса инсантурал къулбасру дурсса петиция хIадур бувну бур ва уттигу къулбасру датIлайнма бур. Щалагу билаятрай ва петициялий миллиондалия лирчусса къулбасру дурну дур. Му дузал хьуну махъ партиялул каялувчитал буккантIиссар Аьрасатнал ПаччахIлугърал Думалийн, тарифирттал масъала низамрайн буцаву мурадрайсса тавакъюращал.

Агъалар Юзбековлул цала ихтилатраву чIурчIав дуруна, тарифру лахъ шаврил ва ялапаршиндарал масъала жагьилсса никиран хъиннува асар хъанай бушиву. Хаснува, лаякъатта бугьан, ягу къатри машан ласун захIмат хъанай бушиву жагьилсса кулпатирттан.
Тамара АхIмадовал кIицI лавгуна, Дагъусттаннал агьалинал гъирарай къулбасру дуллай бушиву Аьрасатнал ПаччахIлугърал Думалувун ласунсса петициялий.

Имара Саидова