Виричунал цIа абад дунни
Вай гьантрай Ккуллал райондалийсса ХIамзат Даххаевлул цIанийсса Ккуллал 2-мур школалий тIиртIунни Ватандалул мурадру буруччаврил ххуллий чувшиврий жан дуллусса Аьлил Аккуевлул цIа абад дуллалисса мармарчарил ула.
Мероприятиялий гьуртту хьунни Ккуллал райондалул бакIчи Ажуб ХIусманов, Ккуллал 2-мур школалул директор Кьурбан Губулов, Хасъсса аьралий операциялул гьурттучи, Вихьуллал школалул директор Оьма Чаринов, СВО-лул Ветерантурал ассоциациялул председатель, Ккуллал райондалийсса «Память гор» тIисса жяматийсса идаралул вакил Нураттин Рамазанов, райондалул пожарный частьрал хъунама Зайнуллагь Кьудуев, аьралий иширттал ветеран Шамххал Хизриев, Аьлил Аккуевлул нину Анисат, кулпат ХIабибат, уссу МахIаммад, дуклаки оьрчIру, шяраваллил жямат.
Аьпалул мажлис байбишин хьхьичI мармарчарил улттуя пардав дукьансса ихтияр дуллуна Ажуб ХIусмановлухьхьун ва виричунал уссу МахIаммадлухьхьун.
Мероприятиялий гьуртту хьун бувкIминнал, аьпалул улттуцI тIутIивгу дирхьуну, дурна минутIрайсса пахъ багьаву.
– ХIакьину жува абад дуллай буру Ватандалул ххуллий жан дуллусса къучагънал цIа. Билаятрай хасъсса аьралий операция баян бувсса ппурттуву, Аьлил исват бувссар цува Ватандалул мурадру хьхьичI ххуттай бивхьусса хIакьсса патриот ушиву. БувчIлай бур хIакьину цуксса захIматсса кьинирду лахъан багьлай буссарив СВО-лий гьуртту хъанахъисса жула жагьилтуран ва миннал нитти-буттан, кулпатирттан. Ватандалийх кьини дурксса чIумалли адаминал чувшиву ккаккан дайсса. Шикку дуклакисса оьрчIан тачIав хъамакъаитантIиссар жула паракьатшиврул цIаний жан дуллусса къучагъ Аьлил Аккуев, – увкунни Ажуб ХIусмановлул.
– Жула аьралитурал исват бунни, иш багьний Ватандалухсса ччаву оьрмулияр ялтту дуккайшиву. Барчаллагь тIий ура къучагъсса арс тарбия увсса нитти-буттахь, учительтурахь. Вирттал сагъссар, ми дакIний буссаксса. Аьлил кунмасса патриотътал буссаксса умудгу, вихшалагу цIакь хъанай дур ххувшаву жула чулий душиврий, – увкунни Шамххал Хизриевлул.
Мукунма Аьлиллул оьрмулул ххуллия бусласисса ихтилатру бувна Кьурбан Лугуевлул, учительтурал.
Виричунан хас дурсса назмурду дурккуна дуклаки оьрчIал.
Арснал аьпа буруччаврил ххуллийсса давривух гьуртту хьун бувкIминнахь ва ула лачIун кабакьу бувминнахь барчаллагь тIисса ихтилат бувна Аьлилул ниттил Анисатлул.