Октябрьданул 1-нния шинмай Ухссавнил Ккавкказуллал муххал ххуллий дуллай бур «Внимание переезд» тIисса месячник. Муния бувсунни «Дагестан» РИА-лий хьусса пресс-конференциялий Ккавкказуллал дирекциялул МахIачкъалаллал региондалул инфраструктуралул хъунаманал хъиривчу Залимхан ЖахIпаровлул.

Ва дуллалиссар муххал ххуллий аварияртту чан шаву мурадрай. Мероприятиялул лагрулий пишакартурал госавтоинспекциялул, надзорданул органнал, муниципалитетирттал ва автотранспортрал предприятиярттал зузалтрал муххал ххуллу лахъайсса кIанттурдай дуван тIий бур цачIусса ххал бигьавуртту. ЛичIинурасса къулагъас дуллан тIий бур шофертуращалсса профилактикалул давурттах.
Залимхан ЖахIпаровлул бусаврийну, 2026 шиная МахIачкъалаллал территориялул управлениялул дазурдайсса муххал ххуллул инфраструктуралул объектирдай сияхIрайн ларсун дур 10 ххуллул транспортрал авария, миннувату 9 хьуну дур муххал ххуллу лахъайсса кIанттурдай.
Ларгмур шинал вара чIумух бурувгун, аварияртту чан хьуну дур 9%. ДТП-лий зарал бивну бур 5 инсаннан, 1 къуртал хьуну ур. Циняв аварияртту хьуну дур шофертал тахсирну, миннал дурукъарччуну дур муххал ххуллу лахъаврил кьяйдарду», – увкунни ЖахIпаровлул.
Яла чIяруми ДТП-рду сияхIрайн ларсун дур Дарбантуллал райондалий (2) ва Избербашлив (2).
МВД-лул УГИБДД-лул надзорданул отделданул госинспектор Шамил Аьбдуллабековлул мукунма бувсунни муххал ххуллу лахъайсса кIанттурдай аварияртту чан хьуну душиву. Ванал бусаврийну, гьашину сияхIрайн ларсун дур мукьра ДТП, миннуву 1 инсан къуртал хьуну ур, 5-ннайн цIунцIияртту хьуну дур. ДукIу вара чIумал хьуну дур 8 авария, ивкIуну ур 2 инсан, цIунцIияртту хьуну дур 9 инсаннайн.
ЗахIматсса масъалану личIлай бусса бур поездирттал хъуни гъаттара ккуччу баву. Гьашину республикалул муххал ххуллурдай сияхIрайн лавсун бур мукунсса 96 иш, миннувагу так ца августрай – 23, ягу 2025 шиналнияр кIилий гьарзану.
Му чулуха яла чIурумурну личIлай дур РЖД-лул вакилнал тIимунийну, Тарумовкаллал, Къарабудахкантуллал, Дарбантуллал, МахIарамкантуллал районнайсса тагьар. Мура чIумал Къизлардал ва Къизилюртуллал районнай гьашину гъаттара муххал ххуллийн бувксса иш цавагу хьуну бакъар, хьхьичIми шиннардий миккугу масъала захIматмунин ккаллину бивкIнугу.
Ризкьи муххал ххуллийн къабукканшиврул РЖД-лул дузал дуллай бур ризкьи буруччаврин хасъсса инфраструктура. Региондалий дурккуну дур 54.4 километралул манзилданийсса ханнакьру, дузал дурну дур 9 километралул манзилданийсса электропастухру (ток нанисса муххал ххаллу). Шинал ахирданийнин Къарабудахкантуллал райондалий дузал дантIий бур ялагу 10 километралийсса чапарду.
Ми дакъасса, муххал ххуллул зузалтрал ттуршрахъул лабизавуртту гьан дурну дур властьрал органнайн ва хасъсса ведомстварттайн, ризкьилул заллухъруннащал ва хIухчалтращал бувну бур 300-нниха ливчусса профилактикалунсса ихтилатру. 2025 шинал муххал ххуллу лахъайсса 8 кIанай асфальт бивхьуну бур, гьашинугу 3 кIанай бишин тIий бур.
Яла чIявуну машинартту заназисса муххал ххуллу лахъайсса кIанттурдай дузал бувну бур видеокомплексру, чани буллалисса маякру, патрульданул машинартту хханшиврул.
Дагъусттаннал Транспортрал министерствалул управлениялул хъунаманал хъиривчу Кьасум МахIаммадовлул бусаврийну, Ухссавнил Ккакказуллал федерал округрал регионнавату республика хIисавну дур бала-апатIру чIявуну шайминнувасса цаннун.
«Тагьар даххана даншиврул аьркинну дур кIанттул цилакаялувшиврулгу, РЖД-лулгу, Госавтоинспекциялулгу, ветеринар къуллугъралгу, ризкьилул заллухърунналгу цачIусса даву дачин дуван. Масъала бивхьуну буссар республикалул каялувчинал контрольданий», – увкунни ванал.
Дагъусттаннал Ветеринариялул комитетрал сакиншиндарал ва ветеринариялул давурттал контрольданул отделданул хъунмур Зайнаб Девришевал бусаврийну, гъаттарал заллухъру буржлувну бусса бур ризкьилий биркарду бищун. Мунийну бюхълай бусса бур муххал ххуллийн бувксса ризкьилул заллухъру кIул бувну, ми жавабрайн кIункIу буван. Муниципалитетирттан аьркинну бур ризкьи канаки баврил ялув бацIлан.
ХI.Аьдилов