Билаллул душ Ибрагьимова Роза

Сентябрьданул 24-нний, хъун бакъасса хIаллай къашавайгу бивкIун, оьрмулул 86 шинаву дунияллия лавгунни Хьурттал шяравасса фронтовикнал Билаллул душ Ибрагьимова (Бариева) Роза.
Роза бувссар 1940-ку шинал Хьурттал шяраву. Арулва класс бувккуну мукьах зий, захIмат буллай бивкIссар колхозрал давурттай. Яла махъ зий буссия Главсулакрай ттучандалий.
Цила лас Имангъазалищал, хъунигу бувну, чийвун буккан бувссар мукьва душ ва ца арс. Минная бивзсса ацIния ххюя арс-душгу хъуни буллай, миннал насихIатчинугу буссия Роза.
ЗахIмат ххирасса, инсантуращал хIал бавкьусса, дакI-аьмал уздансса, циламинналгу, чилгу дянив бусравсса инсан буссия ва.
Роза дунияллия лагаврил кьурчIишивугу кIидачIлай, дакIнийхтунусса жижара буллай буру ласнахь Имангъазалихь, арснахь Русланнухь, душваврахь Рамеллахь, Аьйшатлухь, Гуляхь, Динарахь ва махъсса цинявппагу уссур-ссуннахь, гъан-маччаминнахь.
РухI хъинний дишиннав, алжаннул ххари баннав, махъминнал оьрмурдай барачат бишиннав.

Хьурттал ва ХьурукIуннал
жяматру  

АьбдурахIманнул душ Бучаева Ада

Лахъисса хIаллай къашавайгу бивкIун оьрмулул 84 шинаву жуятува батIул хьунни хIакин-венеролог, Дагъусттаннал косметологиялул аралул хьхьичIунсса специалист, АьбдурахIманнул душ Бучаева Ада.
Ада бувну бур 1942-кусса шинал Лакрал райондалийсса НицIавкIуллал шяраву. Ванил захIматрал ххуллу байбивхьуну бур 1958 шинал ЦIуссалакрал райондалул азарханалийсса фельдшернал даврия. Муния махъсса шиннардий зий бивкIун бур Къадардал участокрал азарханалий медициналул ссувану, ОьрчIал костно-туберкулезный санаториялий ва мукунма Республикалул ОьрчIал азарханалий МахIачкъалалив. Муния махъ зий бивкIун бур Республикалул кожно-венерологиялул диспансерданий хIакинну. 1981-ку шинал ва бивтун бур Косметологиялул лечебницалул отделениялул хъунмурну.
1984-ку шинал зун бивкIун бур Республикалул Косметологиялул центрданул хъунмур хIакинну. Зийгу бивкIун бур шикку тIайлабацIу буну 15 шинал мутталий.
ХIасил, ххаллилсса специалист, гьунар бусса каялувчи Ада Бучаевал цила оьрмулул 40-нния лирчусса шинну харж дурссар медициналун, диялсса хьхьичIуннайшивуртту хьун дурссар Дагъусттаннал дерматологиялул аралун.
АьбдурахIманнул душ Адал аьпа абадлий личIантIиссар ванищал зий бивкIминнал, ванил учениктурал, пациентътурал дакIурдиву.
ДакIнийхтунусса жижара буллай буру ичIуваминнахь ва цинявппагу гъан-маччаминнахь.

Жабраиллул арс Аьбду­рахI­манов
ТIалхIат

Агь, ттул бусравсса дус,
ЧIяйннал цIивикъан,
Ина хIалал бувссар
биялсса хIурмат!
Яраппий, ляхъайма
буттал шяраву,
Вия эбрат ласлай,
оьрму бутланнав.

Сентябрьданул 18-нний оьр­мулул 90 шинаву жуятува личIи хьунни, щалвагу Лакку билаятрай ххуйну кIулсса, ЧIяйннал шяравасса АьбдурахIмановТIалхIат Жабраиллул арс.
ТIалхIат увссар 1936-ку шинал ЧIяйннал хъунмасса Аьбдухъал тухумраясса Жабраиллул ва Зайнавлул кулпатраву. ТIалхIатлун ряхра шин хьуннинна нину-ппу ахиратрал хьуну, ва ччяни ятин хьуссар. Гай захIматсса, ккаши-мякьсса, мискинсса дяъвилул шиннардий, ТIалхIат цичIана увцуну, муналсса буллай бивкIссар ниттирссу Рукьижат ( аьпа баннав цил). Мунияр махъ школалий, оьрчIал къатлуву тарбия ларсъссар. Школа къуртал бувну махъ ТIалхIат лавгссар аьралуннаву къуллугъ бан. Армиялия зана хьуссар хъунама сержантнал чиндалуву. Зун нясив хьуссар ЧIяйннал колхозраву. Учиннуча, «дукъаргьусса мархь ва хьхьури къадиркIссар». Давриву хъинну зирангсса, жяматрангу, чIаххув-чIаравнангу гьарца ишираву ка-кумаг байсса, карчI дакъасса жагьил бусрав хьуссар цинявннан.ТIалхIатлул давривусса марцIшиву, хIарачат хIисавравун лавсун, ва кьамул увссар жаваблувсса давурттайн – Сбербанкрайн, Госбанкрайн. Микку зий унува къуртал бувссар Аьшттарханнал бухгалтертурал техникум. Мунияр махъ зий ивкIссар райондалул шяраваллил хозяйствалул управлениялий бухгалтерну.
ЧIяйннал колхозрал хъунама бухгалтерну зузисса чIумалгу ванал чялишсса гьурттушинна дурссар шяраваллийн багьайсса масъалартту щаллу бавриву.1969-ку шинал ТIалхIатлул къуртал бувссар Самаркьаннал дахху-ласулул институтрал финансирттал факультет. Зий ивкIссар 25 шинай «Даггаз» объединениялул хъунама бухгалтерну. «Даггазрал» бухгалтерия Бытовой хозяйствалул министерствалуву яла хьхьичIунмур хьуссар. Вай ккаккиярттахлу Дагъусттаннал Госсоветрал дуллуссар ванан «Заслуженный работник в сфере обслуживания» тIисса цIа. ТIалхIатлул хъинну чялишсса гьурттушинна дурссар шяраваллил гьарца ишираву, жяматийсса давурттаву. Мунийн бувну, ЧIяйннал жямат мудангу барчаллагьрай бикIайва ванайн.
Жуна цинявннан ххирасса, адаврал ва инсаншиврул увччусса, чаннасса дакIнил ва камилсса пикрилул заллу ТIалхIатлул цала кулпат Саиматлущал (аьпа баннав цил, ванияр урчIра шинал хьхьичI ахиратрал хьуссар) ххаллилсса тарбия дуллуссар цала оьрчIан. Вайгу бур ас-намусрал бувччусса, гьарца дуллалисса давуртту лажин кIялану бартдигьлагьисса оьрчIру ва душру.
ТIалхIат аьпалул шаврил кьурчIишивугу кIидачIлай, жижара буллай буру арсурваврахь Гьаруннухь, Жамбулатлухь, ХIажи-Кьурбаннухь, душваврахь Аслихь, Рукьижатлухь, миннал кулпатирттахь, уссил ва ссил оьрчIахь, цинявппагу махъсса мачча-гъаннахь. Имандалий лавгун лякъиннав, рухI хъинний дишиннав, махънал оьрмурдай барачат бишиннав.

Муртазаьлил арс Кьурбанов Кьурбан

Уттигъанну аьпалухьхьун лавгунни ххаллилсса лаккучу, оьвхъусса инсан, ЦIуликъяннал шяравасса Кьурбанов Кьурбан Муртазаьлил арс.
Увну ур Кьурбан 1961-ку шинал Ахъушиял райондалийсса ЦIуликъяннал шяраву. ЧIивинийва захIмат ххирасса, дуккавриву итххявхсса, дусшиву дан кIулсса, гьарица чулуха эбратрансса оьрчI ивкIун ур. Школагу къуртал бувну, аьралуннаву къуллугъгу бувну махъ зун ивкIун ур щупирну.
Цал зий ивкIун ур МахIачкъалаллал автобусрал паркраву (ПАП-1), 1989-ку шиная айивхьуну, сайки бусса оьр­мулий зий ивкIссар анаварсса медициналул кумаграл щупирну. Ва хьуна ванал цала дакIнил ларсъсса давунугу. КIула Кьурбаннун цала анаваршиврийн ва тIайлану сукку тIутIаврийн хъар шайшиву инсаннал оьрму. ЛяличIисса хIурматран лайкь хьуссар Кьурбан захIматсса чIумал ккаккан дурсса чувшиврухлу. Чачаннал дяъвилул иширттал чIумал ва цимилагу лавгссар медициналул бригадарттащал хьхьичI ххуттайн, щавурду дирми буккан бан. Мугу цала чувшиврун ккалли дуллан къаикIайвача, цала буржну чIалан икIайва.
ЗахIматрал ххуллийсса ккаккиярттахлу, Кьурбан лайкь хьуссар «Заслуженный водитель РД» тIисса бусравсса цIанин. Даврил уртакьтуран, медициналул зузалтран ва дакIний ливчIссар захIматсса тагьарданий вихшала дишин шайсса инсанну.
Цала кулпатравугу Кьурбан ия хъинсса ласгу, аякьа дусса ппугу, ччаву дусса уссугу. Цаламур дард-буруккин, пашманшиву тачIав ялун личингу къадайва.
ДакI-аьмал хъинсса, аьчухсса, чумартсса, кумаграх мюхтажнал чIарав ацIан чялишсса Кьурбан аьпалул шаврил кьурчIишиву кIидачIлай, жижара буллай буру кулпатрахь, оьрчIахь, уссур-ссуннахь, цинявппагу мачча-гъаннахь. РухI хъинний дишиннав, алжаннул ххари аннав.