Оьрмулул 27 шинавусса предприниматель, футболданул экосистема SOTA хIасул дурсса, ЧукIуннал шяравасса Нажмуттиннул арс, Тахи Оьмаровлуя чивчуну бур машгьурсса «Forbes» журналданий. КIива мукъуйну учин, SOTA – ва айти-платформар. Най бунува кIицI лаганна, нава айтилул дунияллий аьвамсса бушиву. Ттунма бувчIусса ккуццуй бусаннив, ва футболданул дунияллий­сса хъуннасса хьхьичIуннайшиву дусса дур.

Цаппара шиннардил хьхьичI футболданул аналитика дайсса диркIун дур карунних. Пишакартал, цIуницIа матчру ххал буллай, гьанумур иширах къулагъас дуллай, гьаннайсса, статистика салкьи дурну, тренертуран кумаг буллай бивкIун бур цукунсса-бунугу хIукму буваншиврул миннал. Масалдаран, вихшала дишин буллалисса пулан, зирангсса игрок машан ласун урив, акъарив. ХIакьинусса кьини тIурчарив, технологиярттал кумаграцIух клубирттаща хIадурнувасса маслихIатру хьхьичIун ласун хъанай бу­сса бур. Тренертуран аналитика чара бакъа аьркинну дакъарив, даву магьир дуван. Искусственный интеллектрал гьанулий клиентнал хьхьичI ядишин бюхълай бусса бур матчирдал автоматический разбор, муттаэтурал анализ. Ссаву ци буссарив лалавсун, хъиривмур матчрай даву усттарну щирикIин дуваншиврул. Вана укун SOTA-лул гъан бувайсса бур футболданий буклакиминнал ххувшавричIансса ххуллу.
Арулла шин дурну дур Тахил ва давриха зий. 2018 шинал дуснащал, профессионал футболистнащал, архIал, дунияллул футболданул рынокрал технологиярттахсса мякь чIалай, байбивхьуну бур зий футболданул аналитиктуращал, 50 азарва долларгу харж бувну, хIасул дурну дур продукт.

«ДачIи арцу на дурххусса грантрал дузал дурна, лирчIми –приложениярттал разработкартту дуллай салкьи хьуминнуя. Продуктрал иш бачин баншиврул, жу футболданул Ватандалийн, Великобританиянавун лавгссияв. Компаниялул «Бирмингем Ситилущал», «Лестер Ситилущал» ва «Челсилущал» пилотный проектру хIисаврай щурущи дурна. ЖучIа 40 аналитик уссар, чIявуми Узбакисттаннай ва Къазахъисттаннай зий буссар программалуха», – тIий ур Тахи. Ва цувагу махъ ппур­ттуву, сантирай ва лябуккулий зуншиврул, Къазахъисттаннайн ивзун ур. Цалчинсса расмийсса машагу гьамин Къазахъисттаннал рынокрай бувну бур, Алма-Аталул мини-футболданул лигалул машан ларсун дур вай­ннал продукт. Уттирив ванал клиентътураву бур США-васса колледжру, Аьрабусттаннал клуб «Аль-Хиляль», Узбакисттаннайсса, Азирбижаннавусса клубру.

«2030 шиналнин жу футболданунсса технологиялул компаниярттаву яла хьхьичIунминнул ххуттайн гьаз хьунтIиссару. 2025 шинал лирчIмур дачIи шинай жу жулва клиентътурал база Централ Азиянаву, США-наву ва Саоьдуллал Аьрабусттаннай хъун буван хIарачат буллали­ссару. ЦIанакул SOTA зузи­ссар урчIва билаятраясса клиентътуращал», – тIий ур жагьилсса предприниматель. Ва хIакьину каялувшиву дуллай ур искусственный интеллектрал кумаграцIух спортрал аналитикалуха ва маркетинграха зузи­сса хъуннасса командалий.
Бусанна Тахил мархраягу. Ванал буттал ппу МахIаммад Оьмаров лакрал халкьуннан кIулссар гьунар бусса чичу ва журналист, публицист хIисаврай.

Тахил ппу Нажмуттин, аьпа биву, ччяни дунияллия лавгуна, бюхъу-бажар бусса предпринимательгу, патриотгу уссия, итххявхсса спортсментурал чIарав ацIлацIисса.Цувагу цIакьсса каратистъя. Тахил нину Батуля Дагъусттаннал Минфиндалий отделданул хъунмурну зий буссия, махъсса шиннардий Москавлийн бивзун, Дагъусттаннал диаспоралул культуралул давурттаву чялишну гьуртту хъанай бур.
Тахил ниттил ппу Аьбдулкьадир НякIучиевгу шеърирду чичаврил гьунар бусса, цаппара луттирду итабавкьусса инсан ур. Ва Дагъусттаннал Халкьуннал творчествалул къатлуву, Поэзиялул театрдануву зий икIайссия. ЧIивимур ссу Шуаьнат бюхханну шеърирду бу­ккайсса, литература кIулсса, ххирасса душри, цуппагу Аьрасатнал лайкь хьу­сса артистка, Дагъусттаннал халкьуннал артистка Фаина Графченкол ученицар. Гьаннайсса, Тахил оьрчIшиву творчествалул инсантурал дянив ларгссар. Цувагу литературагу ххирасса, гьарца чулуха итххявхсса, дунияллий хъанахъимуния хавар бусса, гьармунихсса ябитаву куртIсса жагьилли.

Школалий дуклай унийва ялун ливчуну бур ванал интернет-предпринимательнал гьунар. Тахил хIасул бувсса сайт 400 долларданун баххи тIисса инсан увккун ур, гъира багьну, сайтру хIасул буллан ивкIун ур. Цала кIицI лавгсса журналданун дуллусса интервьюраву тIисса куццуй, 10-мур классраву дуклакисса ппурттуву вай сайтирдая ванан 1000 доллардануяр ххишаласса арцу дуркIун дур.

Тахил марцIну ххювардай къуртал бувссар МахIачкъалаллал 39-мур лицей. Школалийва дуккавриву итххявхсса Тахил, республикалул лагрулийсса олимпиадар­ттай, конференциярттай гьуртту хьуну, хьхьичIунсса кIанттурду бувгьуссия. Москавлив хьусса элмулуха зузисса Аьрасатнал жагьилтурал «Шаг в будущее» форумрай Тахил «Финансовая пирамида в век информационных технологий» тIисса доклад бувну, конференциялул лауреатнал дипломращал зана хьуссия. Национальный исследовательский институтрал, цамургу конференциялий бувсса докладрахлугу лайкь хьуссия мукунмасса дипломран.

КьатIаллил билаятирттаясса студентътал ва дуклаки оьрчIру гьуртту хьусса «Эрудиты планеты – 2014» тIисса Дуния­ллул халкьуннал олимпиадалий хьхьичIунсса гьурттушинна дурнугу дипломращал зана хьуссия. МахIачкъала шагьрулул мэрнал цачIанма оьвкуну бивкIссар ванайн дуккаврил гьунар бусса оьрчIащал архIал.
Школалийва айивхьуссия Москавливсса ца яла хьхьичIунмур вузрачIансса ххуллу гъан буллайгу. МГУ-раву Высшая школа бизнеса факультетрай 1-мур курсирай дуклакиминнаву Тахи яла жагьилмая, ванан 17 шин дуссия му ппурттуву.

Тахи так дуккавриву хьхьичIунма акъая. Ва Аьрасатнал чемпионгур кёкусинкай-каратэлул журалуву. Ванал ххувшавурттая жу цимилагу чивчу­ссар «Илчи» кказитрайгу. Спортрал дунияллийминнуягу, элмулул ххуллийминнуягу. Вана утти дунияллул лагрулийсса хьхьичIуншивриягу буслай.
Ва футболданул индустриялул лидертал батIайсса мероприятиярттай гьуртту хьун чIявусса билаятирттайн ивну ур. Берлиннай, Эр-Риядлив, Алма-Аталий ва цаймигу шагьрурдай лавайсса даражалий дурну дур SOTA компаниялул презентацияртту.

«Циняв бикIай ца яла захIматмур вуз язи бувгьуна, уттигу ца яла захIматмур даву язи дургьунни тIий. Циванни на захIматшивурттая нигьаусан аьркинсса? ЗахIмат буний ялунгума гъира ххишала шайхха, нагу гъирарай зий ура. Ххуллу так кьасса къабикIайссар, къюкъунчарттаримур ххуллугур битан аьркинсса.

Ца чIумал на бувккуссия ца ганз чIахIлул хасиятрая. Ганз чIахIри цIубутIуй ххюра шинай лавай гьаз хъанан, ххяхлан къабикIайсса бур. Мархри цIакь буллай . Яла, мархри цIакь хьуну, авкьатсса гьану хьувкун, ми анаварсса бущилий гьаз хъанай бачайсса бур. Жулгу 2030 шиналнин рынокрай хьхьичIун буккансса мурад бур», – тIий ур Тахи.

Вихшаласса шаттирдай гьаз хъанахъисса SOTA компания хIасул дурсса Тахил, IT-продуктру, дузалгу дурну, хьхьичIуннай давриха зузаврил 15 шинал опыт бур, спортрал аналитикалул индустриялул дунияллий зийгу 6 шинал опыт бур. Потенциалгу бур. Гьунаргу бур. ТIайлабацIу баннав, Тахий! Ина ша бизлазисса циняв ххуллурду Заннал вин тIитIиннав!