Май зурул 18-нний Москавлив Измайловский паркраву хьунни «Дагъусттаннайнсса аьрххи» тIисса Культуралул фестиваль. Гьар шинах кунна, Дагъусттаннал Постпредствалул сипталийну ва сакиншиннарайну.
Вайннал бувсунни фестивальданий гьуртту хьушиву 30 азарунниха ливчусса инсантал. Хъамаллурансса майданну миллатрал колоритрал чIюлу бувну, хIадур бувну бия, хъунисса баннерду дия. Миллатирттал дукрарду, тIахIунттив дуллалисса, бартбисуртту щашлашисса, тIахIнилий накьичру дихьлахьисса ва цаймигу пагьмурду лахьхьин буллалисса мастер-классру хьунни.
Гала-концертрай гьуртту хьунни Дагъусттаннал халкьуннал артистътал Лариса ХIажиева, Рашид Багатаев, Рукьият ХIамзатова ва цаймигу машгьурсса балайчитал. Цалчинмур ЦIувкIратусса цIанихсса пагьламан Расул Абакаров хьхьуттайх лавхъунни.
Дия спортрал программагу. Дагъусттаннал спортсментурал лачIун буккаврил тIуркIурду ккаккан бунни, Дагъусттаннаясса студентъталлив Постпреднал кубок ласунсса футболданул турнирданий бяст-ччаллий бувккунни. Соревнованияртту къуртал хьувкун, Постпред Владислав Толстюклул ххув хьуминнан дипломру буллунни.
«Ва фестиваль Москавуллал агьалинан ва лагма-ялттусса шагьрурдай яхъанахъиминнан ххира хьусса фестиваль душиву чIалан бикIай чIявусса агьали батIаврийну. Дарщусса кьини дунугу, биялсса агьлу тамашалий бия. Дагъусттаннал культуралия, багьу-бизулия хавар ласун ччиминнан мюнпатсса даву душивруцIун, республикалул цIа-кьинигу гьаз дуллалисса, туристъталгу кIункIу буван куннасса давугу хъанай дия», – увкунни Дагъусттаннал Культуралул центрданул Президиумрал член Басират Билаловал.
ПатIимат Рамазанова
