Ися МахIаммадов

НурмахIаммадлун

Душманная вила
Ватан дуручлай,
Виричунал цIанин
Лайкь хьу зунттал чув,
Вил цIа личIантIиссар,
Лак хIайран буллай,
Буссаксса аьрщарай
Гай оьрму бутлай.
Вил цIа личIантIиссар
Мусих чирчуну
Жула Ватандалул
Яргсса тарихрай.
Барчаллагь вил ниттин,
Барчаллагь буттан,
Ина кунасса арс тарбия увсса.

Фархадлун

Душманнащал талай,
Тивталну иллай,
Ина Виричунал
ЦIа хIалал дунни.

Вил гьунар ливчIунни
Махънан эбратну.
Вил ЦIуку гьаз хьунни
Ссавнил цIурттачIан.

Исламлун

ЧIивисса миллатрал
Хъунасса къучагъ,
Мукьийла дунъяллул
Чемпион хьума,

Вила Ватандалул
ЦIа машгьур дурма,
Барча вил ххувшаву,
Чаннаннил Ислам!

Мудан бура чялишну
Марзижат Буттаеван

Политикалул элму
Сивсуну ахттар дуллай,
ЦIа дурксса доктор хьунни
Вияту му элмулул.

Дагъусттаннал хъанниву
Вил цIанил хIурмат лахъри,
МуницIун чанссавагу
Пахру къабара ина.

Элму кунма, вин ххирар
Винма кIулсса инсантал,
Аьркиннан кумаг буван
Мудан бура чялишну.

Элмулуха зузисса
Вил кьалам ссукъассиннав,
ЧIа кусса мурадирттайн
Мудан биллай личIаннав.

ЦIущуллал чаннацIукуй,
ЦIуллушиврий битаннав,
Тти инагур лахъ бувсса
Ватандалул хъун тарих.

ХIарачатгу, бюхъугу
Рапи Абакаровлун

Ас-намусрал бивзхьунссар
Вил хасиятрал гьану,
Уттинин царагу аьй
КъаларчIунни муницIун.

Райондалул бакIчину
Инава зийни Ваччав,
Дурссар ина тамансса
ЯбацIансса давуртту.

Цаймигу къуллугъирттай
Ина чIалачIи бувссар
ХIарачатгу, бюхъугу
Ххину бусса ушиву.

Чаннал видурцIусса дур
Вил дакIгу, хасиятгу,
Инава кIулнал дянив
Вил кьимат бур лавайсса.

Вин ххирар буттал улча,
Ххирар вила миллатгу,
Ниттил мазгу буруччин
Ура бюхъаймур буллай.

Ина кунмасса арсру
Чан къахьуннав лакраву,
Ятин хьуну къаличIан
ТачIавгу Лакку кIану.

Бюхъаннав буллалимур
Супиян Расуловлун

Цагу-кIивагу бакъар
Вийн мютIисса пишарду.
Чичултрал кьюкьлувугу
Ура утти авкьуну.

Лакку мазрай бувара
Ина нахIуну гъалгъа.
Жяматрал дянивугу
Ура яргну чIалайсса.

Бюхъаннав буллалимур,
Дулуннав вихьхьун тавпикь,
Вила ххуллул дулантту
Бахтти буну дитансса.
Мукьххару

***
Лагьмур зунттуйн
Лавхънащар
Лахъмургу
Битан шайсса.

***
Хьхьиру чан хьуну бур
Ттул буттал улклуй,
Вайгу бивзуривав
Утти шагьрурдайн?

***
Инара дайсса даву
Дулува дакIнийхтуну,
ЛичIаншиврул аьрщарай,
Ца дунугу, вилла аьш.

***
Чарий чару бихьлайри
Усттарнал чIалъаь байсса,
Махъ мукъуцIун бахIлайри
Шаэрнал шеъри байсса.

***
Къупливату тIутIив
Личайсса кунна,
ДакIнива личайссар
Назмурдал махъру.

***
Цалли шинал мутталий
Арду тIутIайх дичайсса,
Цалли оьрмулул ххуллий
Жагьилшиву дучIайсса.

***
Я щутари интнил
Ранг-рангсса тIутIайн,
Ттул хьхьичI бацIай дустал,
ЧIун хьуннин лавгсса.

***
Дакъахьурча чIаххуврал
Куннал куннайн вихшала,
Гайннал оьрму бачайссар
Оьлуркъусса нех кунма.

***
Аьрщи – щюллишивруву,
Ссав – щалла някIшивруву:
«Отпускрая дуркIсса» инт
Зий дур лап дулуркьуну.

***
Магаришру буллай
Даврий авцIума
Магаришру ласлай
ДаврицIа хьунни.

***
ЧIумуя биялну
Хайр ласлан ччима
ГаницIун авкьуну
Зунгу аьркинссар.

***
ХъункIултIутIуй хъякусса
Цамур тIутIуха лащай
Ганил ялув щябивкIсса
Наранжи чIимучIали.

***
Ххуллул дикIай дайдихьу,
Ххуллул дикIай дайлитIу.
ЧIумул дурвав дайдихьу,
ЧIумул дурвав дайлитIу?

***
Ца чIапIи ливчIун бур
Гьивчул мурхьирай,
Ссутнил лишан кунна,
КIинтнин кьадиртсса.

***
Баргъ бизар хъананссия,
Дакъассания аьрщи.
Барз ссалъя чанна буллан,
Бакъания баргъ ссавний.

***
Хар-хавар бакъа бувкIун,
Ранг-кьачIа ссурулккуртлул,
Бурги, дазайсса ххуйну
КIа ссав ва аьрщарацIун!

***
КIяла тIутIал тIивтIунни
Къупава цала яру –
Аргу кIяла ларгунни,
Марххала бувсса кунна.

***
ОьрчIшиву тIабиаьтрал интри,
Жагьилшиву ганил гъири,
Агьилшиву тIабиаьтрал ссутри,
Хъунав шаву ганил кIири.

КIиххару

***
Щак-щук тIисса инсаннан
РахIатшиву къакIулссар.

***
Увччу хьунал мазрая –
БакIран баласса махъру.

***
Нехханни бувчIайсса
Щаращулмур маз.

***
ХIиллакарсса цулчIагу
Бирияйссар къатIухьхьун.

***
«Икрамру» чIяву хьурча,
Чувнайн кьуси бучIайссар.

***
Бургъий аьйрду ляхъланнин
ВиламиннуцIа марцI хьу.

***
Ца кьурчIисса мукъулгу
Ччаврий ттангъа дувайссар.

***
Баргъ бур гьузуй бяруву,
Урдакру хIайран буллай.

***
ДусначIан нани ххуллул
Инсан уххан къаайссар.

Лакку мазрахасса санна

Лакку маз –
Вил ниттил маз,
Лакку маз –
Вил буттал маз,
Лакку маз –
Вил щарнил маз,
Лакку маз –
Вил лакрал маз.

Буси, туну,
Циванни
Вин лакку маз
КъакIулсса.
На хIакьсса
Лаккучура
ТIий унува
Инава.

Вингурхха
Лахьхьин бувсса
Лакку маз
Вила ниттил,
Лакращал
Баваншиврул
Ихтилат
Ниттил мазрай.

Лакку маз
Хъамабивтми,
КIулминнал
Уртакь хьуну,
ХIакьину
Буссар оьвтIий,
Лакку маз
Ябара тIий.

Къагьассар
Дахьва махъру
Лакку маз
Ябаншиврул.
Аьркинссар
Га ябуллан
Балжисса
Иширттайну.