Дагъусттаннал техникалул университетраву «БучIантIимунивунсса ша» тIисса цIанилу выпускниктурал ярмарка хьунни. Ва дайдишиннин, аьдатрайн бувну ятIул дипломру буллунни университет марцIну ххювардай къуртал бувминнан.
ЯтIул дипломрал заллухъру барча буллалисса махъ лахълай, университетрал ректор Назим Баламирзоевлул кIицI лавгуна, Аьрасатнал президент ва Дагъусттаннал хъуними жагьилтурал куртIсса ва цIакьсса кIулшивуртту ласаврил ххуллийсса давурттах дагьайкунсса къулагъас дуллай бушиву. Бувсуна ДГТУ ЯтIул дипломирттайну къуртал бувшиву гьашину 82 выпускникнал. ЯтIул дипломру хьхьичIва-хьхьичI студентътурахьхьун булун тапшур бувна хъамаличунайн, Дагъусттаннал ХIукуматрал хъунаманал хъиривчу Нариман АьбдулмутIалибовлуйн. Ванал увкуна: «Жунма кIулли Даггостехуниверситет жулва билаятрал ва республикалул ца яла хьхьичIунмур вуз хIисаврай, университетрал коллективрал хъунмасса хIарачат бур выпускниктурая цалла даву ххуйну кIулсса, республикалул хайр-мюнпатрансса пишакартал хIадур буваврил цIаний».
Выпускниктал барча буллалисса ихтилатру бувна вава вузрал выпускник, «Электросвязь» АО-рал гендиректор Будун Будуновлул. Дипломру буллалисса шадлугъ къуртал хьувкун, цинявппа преподавательтурал цIанияту выпускниктал барча бувна философиялул элмурдал доктор Юсуп Аьбдулкьадировлул. Ректорнахь ва преподавательтурахь барчаллагьрайсса махъ лавхъуна выпускница Амина Арсланбаговал.
ПатIимат Рамазанова
