Грозналий нанисса Ккавкказуллал инвестициярттал форумрал 2-мур кьини Дагъусттаннал стенд ккаккан увкIунни Аьрасатнал ХIукуматрал председатель Михаил Мишустин. Каспий хьхьирил зумардайсса кластерданул ва Ахттиял къала цIу буккан баврил прорыв проектирдал хIакъираву бувсунни республикалул каялувчи Сергей Меликовлул. Вай кIивагу проект ккаккан бивхьуну бивкIссар Дагъусттаннал экспозициялий.

Выставкалий ккаккан дурну дур СКФО-лул регионнал хьхьичIуннайшивуртту ва бю­хъурду, цIусса бизнес-идеярду, мукунма агьамсса ххуллурду ва лябуккулул стратегияртту.
Республикалул гьавалул шартIирдайну бюхълай бур лябуккан буллан гьивчул ва пуннукьирттал багъирдал проектру. Пландалий бур 50 азарда тонна лагрулул ахъулсса ядайсса къа­тта ва 15 азарда тонна лагрулул ахъулсса ва ахънилсса ядайсса къатри.
Михаил Мишустиннул був­чIин бувна ца региондалун циван личIи бувну буссарив 5 «прорывной» проект. Ванал тIимунийну, регионнал давурттан кьимат бищайссар 4 ккаккиялийн чул бивщуну: виваллил региондалул продукт, основной капиталданувунсса инвестициярду, зузи кIанттурду, агьалинал хIакьсса доход гьарза шаву. «Ххюва прорыв проект личIи бувссар хасъсса региондалул къалип (облик) дурчIиншиврул», – куна ХIукуматрал председательнал.
Премьер-министрнал дурна ХIукуматрал комиссиялул члентуращалсса совещание, микку ххал бивгьуна СКФО-лул социал-экономикалул масъалартту.
Ваний махъ лавхъуна Сергей Меликовлулгу. Ванал бувсуна республикалул социал-экономикалул лябуккулул агьамми ккаккиярттая ва республикалий бартбигьлагьисса проектирдая.
Михаил Мишустиннул дакI­нин бувтуна Ухссавнил Аьса­тIиннан, Дарбантуллан ва Ккав­кказуллал Минеральные Воды региондалул курортрал шагьрурдан хасну кьамул дурну душиву лябуккулул комплексъсса планну. Вай давуртту бакIуйн дуккан даву мурадрай федерал бюджетраву ккаккан дурну дур 9,5 млрд къуруширттал.
ХIукуматрал Дагъусттаннан, Ингушетиянан ва Ухссавнил АьсатIиннан кумаг буллалиссар тIювалул коммунал хозяйствалул системартту цIу дуккан дуван (модернизация). Мунияту щурущи бувну бур цасса регионал оператортурал давуртту цалийн дуцайсса пилотный проект. ХIукуматрал председательнал бувсуна занакьулу дайсса промышленностьраву ва шяраваллил хозяйствалуву хьун дурсса хьхьичIуннайшивурттал хIасиллаятугу.
Округрал лябуккулун тамансса кумаг хьуну бур приоритет арардаву 35 прорыв инвестициярттал проект бартбигьаврия. Миннул округран дучIан дурну дур сайки 330 млрд къурушир­ттал. 2030 шинал ахирданийннин миннуйну дузал хьунтIий бур 87 азара инсаннансса зузи кIанттурду.
Масъала ххал бивгьуну махъ Михаил Мишустиннул дурна цаппара тапшурлугъру.
Ухссавнил Ккавкказуллал регионнай традициялийну оьрчIру баврил даража лавайсса бур, мунияту дузал дуван аьркинну дур жагьилтуран дуклансса ххуйсса шартIру. Ва ххуллий цила мюнпатшиву тасттикь бувна «Профессионалитет» проектрал. Регионнан кумаг бувантIиссар 2026 шинал «Профессионалитет» проектрал лагрулий кластерду буван батIул буллалисса заявкарду хIадур дуллалийни.
Округрал транспортрал системагу цIу дуккан дуван аьркинни. Мунийн бувну, ХIукуматрал Председательнал Транспортрал, Экономразвитиялул , Финансирттал, Строительствалул минстерстварттахь тавакъю бувна регионнащал ва «РЖД-лущал» цачIу хIадур дуван муххал ххуллул сеть ххуй даврил хIакъиравусса предложенияртту.
Ттинияр тихунмайгу зун­тIиссар Ухссавнил Ккавкказуллал туризмалул потенциал цIакь баврил масъаларттаха.
Михаил Мишустиннул жаваблувсса къуллугъчитурайн тапшур бувна Ухссавнил Ккавкказуллал федерал округрал лябуккулул масъалартту дузал баврил ялув бацIаву дуван.
Яла Сергей Меликов хьунаавкьуна УзбакIисттаннал илчи Ботиржон Асадовлущал. Ххал бивгьуна республикартту хIала-гьурттуну зузаврил масъалартту.
Форумрал хIасиллан хасну Сергей Меликовлул жавабру дуллуна журналистътурал суаллахьхьун.